बाँकेको नरैनापुरमा भीषण आगलागी, ५० भन्दा बढी घर जले
प्रकाशित मिति : चैत्र २१, २०७७ शनिबार
बाँकेको नरैनापुरमा भीषण आगलागी भएको छ। नरैनापुर गाउँपालिका ४ खोदवामा भएको आगलागीबाट ५० भन्दा बढी घर जलेर नष्ट भएका छन्। गाउँका आधाभन्दा बढी घरमा क्षति पुगेको छ। आगलागीमा परी केही घाइतेसमेत भएका छन्। घाइतेको उपचारका लागि नेपालगञ्ज लगिएको छ।
तीव्र गतिमा हावाहुरी चलिरहेको आगो नियन्त्रणमा कठिनाइ भइरहेको बाँके प्रहरीले जनाएको छ। नेपालगञ्ज उपमहानगरपालिका र अन्य स्थानबाटसमेत दमकलको सहायतामा आगो नियन्त्रणको प्रयास भइरहेको जिल्ला प्रशासन कार्यालयले जनाएको छ।
यसअघि नरैनापुर गाउँपालिकाकै वडा नम्बर ६ दोन्द्रागाउँमा गत मंगलबार आगलागी भएको थियो भने फागुन २४ गते पनि नरैनापुर गाउँपालिका १ को सुइया गाउँमा भएको आगलागीमा २२ घर गोठ जलेर नष्ट भएका थिए ।