कोरोना खोप खरिदका लागि विश्व बैकले नेपाललाई ८ अर्ब ७० करोड ऋण दिने
प्रकाशित मिति : चैत्र २०, २०७७ शुक्रबार
सरकारलाई विश्व बैंकले कोभिड–१९ विरुद्धको खोप खरिदका लागि करिब आठ अर्ब ७० करोड रुपैयाँ (७५ मिलियन अमेरिकी डलर) सहुलियतपूर्ण ऋण उपलब्ध गराउने भएको छ।
जनसंख्याकाे उच्च प्राथमिकता प्राप्त समूहमा कोभिड–१९ विरूद्धका सुरक्षित र प्रभावकारी खोपको पहुँच विस्तार गर्न प्राप्त हुने सहुलियतपूर्ण ऋण सहयोगसम्बन्धी सम्झौतापत्रमा अर्थ मन्त्रालयका सचिव शिशिरकुमार ढङु्गाना र माल्दिभ्स, नेपाल र श्रीलङ्काका लागि विश्व बैंकका राष्ट्रिय निर्देशक फारिस हदाद–जर्भोसले शुक्रबार अर्थ मन्त्रालयमा हस्ताक्षर गरे।
सो अवसरमा सचिव ढुङ्गानाले कम्तिमा पनि ७२ प्रतिशत नेपालीलाई खोप लगाउने सरकारको बृहत् योजनाका लागि यो अतिरिक्त वित्तीय सहयोग महत्वपूर्ण भएको बताए। उनले कोभिड–१९ महामारीको प्रतिकार्यका लागि कोभिड–१९ विरूद्धका खोप खरिदका साथै नेपालको राष्ट्रिय खोप वितरण योजनाअनुरूपको प्रभावकारी खोप सेवा विस्तार र नेपालको स्वास्थ्य प्रणालीलाई सुदृढ तुल्याउन अति उपयोगी हुने विश्वास व्यक्त गरे।
‘कोभिड–१९ विरूद्धका सुरक्षित र प्रभावकारी खोपहरूको समतामूलक र द्रुत पहुँच विस्तार गर्न तथा महामारीबाट जीवन जोगाउन महत्वपूर्ण हुनेछ,’ विश्व बैंकका राष्ट्रिय निर्देशक जर्भोसले भने।
यसअघि बैंकले तीन अर्ब ३० करोड रुपैयाँ बराबरको कोभिड–१९ आपतकालीन प्रतिकार्य र स्वास्थ्य प्रणालीका लागि सहुलियतमा ऋण दिएको थियो।