अमेरिकी पासपोर्टको आवेदन शुल्क बृद्धि गर्ने प्रस्ताव फेडरल रजिष्टरमा
प्रकाशित मिति : चैत्र १३, २०७७ शुक्रबार
अमेरिकी सरकारको विदेश मन्त्रालयले पासपोर्टको आवेदन शुल्क बृद्धि गर्ने प्रस्ताव फेडरल रजिष्टरमा प्रकाशित गरेको छ । आज प्रकाशित प्रस्तावित नियममा ६० दिन अर्थात् मे २५ सम्मको कमेन्ट अवधि राखिएको छ ।
फेडरल रजिष्टरमा प्रकाशित सुचना हेर्न यहाँ क्लीक गर्नुहोला ।
पासपोर्ट सुरक्षा शुल्कका नाममा उक्त शुल्कबृद्धिको प्रस्ताव गरिएको हो । अहिलेसम्म यो शुल्क ६० डलरमात्र रहेकोमा ८० डलर बनाउने प्रस्ताव गरिएको छ । जस अनुशार आवेदकले अमेरिकी पासपोर्टका लागि आवेदन दिंदा अहिलेसम्म ११० डलर तिर्दै आएकोमा १३० डलर हुनेछ ।
त्यस्तै बालबालिकाहरुका लागि पासपोर्ट आवेदन दिंदा ८० डलरमात्र लाग्दै आएकोमा १०० डलर शुल्क तिर्नुपर्नेछ । शुल्कबृद्धिबाट बार्षिक रुपमा सरकारलाई थप ७२ मिलियन डलर आम्दानी हुने अपेक्षा गरिएको छ ।
पूरानो शुल्कमा ३३ दशमलव ३३ प्रतिशत शुल्क बृद्धिको प्रस्ताव गरिएको छ । हरेकबर्ष १२ मिलियनको हाराहारीमा पासपोर्टका लागि आवेदन प्राप्त हुने गरेको र आर्थिक बर्ष २०२२ मा १५ मिलियनसम्म आवेदन पर्ने अपेक्षा गरिएको छ ।
यो नियम आगामी आर्थिक बर्षबाट लागु गर्ने अमेरिकी विदेशमन्त्रालयको योजना रहेको छ । तर त्यसका लागि कमेन्ट अवधि सकिएपछि अन्तिम सुचना फेडरल रजिष्टरमा प्रकाशित गरिनेछ ।