माओवादी केन्द्र सर्वोच्चको फैसलाविरुद्ध पुनरावलोकनमा जाने
प्रकाशित मिति : चैत्र १०, २०७७ मंगलबार
नेकपा माओवादी केन्द्रले फागुन २३ को सर्वोच्चको फैसलाविरुद्ध पुनरावलोकनमा जाने भएको छ। सिंहदरबारमा बसेको स्थायी कमिटीको बैठकमा नेताहरु फैसलाविरुद्ध पुनरावलोकनमा जान सकारात्मक भएका हुन्। सर्वोच्च अदालतले फागुन २३ गते नेकपाको एकीकरण बदर गर्दै एमाले र माओवादी केन्द्रलाई ब्युँताएको थियो।
सिंहदरबारस्थित संसदीय दलको कार्यालयमा माओवादीले कानुन व्यवसायीसँग पनि परामर्श गरेको थियो। कानुन व्यवसायीहरुले फैसला पुनरावलोकनमा जान सुझाव दिएका छन्।
‘सर्वोच्चले फागुन २३ गते गरेको फैसला विशुद्ध राजनीतिक देखिन्छ। त्यसैले पुनरावलोकनमा जान सुझाव दिनुभएको छ। पुनरावलोकनमा जान हामी सकरात्मक छौं,’ नेता देव गुरुङले भने।
प्रधानमन्त्री केपी ओलीले कानुनीरुपमा नमिले पनि राजनीतिक रुपमा विघटनका बाटा रोज्नसक्ने भन्दै कानुन व्यवसायीहरुले दलहरुले राजनीतिक रुपमा नै छलफल गर्नुपर्ने सुझाव दिएका थिए।
‘प्रधानमन्त्रीले पटकपटक संसदले काम गर्न सकेन भनेर फेरि निर्वाचनकै कुरा गरिरहनुभएको छ। अस्ति राष्ट्रपतिकहाँ पनि यो कुरा गर्नुभयो। पटकपटक भंग गर्ने कुरा गरिरहनु भएको छ। त्यसैले यो अवस्थामा कसरी संसद र संविधानको रक्षा गर्न सकिन्छ भन्ने विषयमासमेत कानुनविद्सँग छलफल गर्यौं,’ गुरुङले भने।