तेश्रो चरणको राहत चेक आएन ? ५ वटा कारण हुनसक्छन्
अमेरिकी सरकारको आईआरएसले ९० मिलियनलाई तेश्रो चरणको राहत चेक पठाएको छ । अधिकांशको राहत चेक सिधै बैंकमा डिपोजिट गरिएको छ भने केहीको हुलाकमार्फत आउँदैछ । यदि तपाईको राहत चेक अहिलेसम्म आएको छैन भने ५ वटा कारणहरु हुनसक्छन् ।
पहिलो, तपाईको राहत चेक अहिलेसम्म प्रकृया नगरिएको हुनसक्छ । अनलाइनमा चेक गर्दा पेमेन्ट स्टाटस उपलब्ध नभएको जानकारी पाउनुभएको खण्डमा आत्तिनुपर्दैन ।
यदि तपाईले यो सन्देश पाउनुभयो भने तपाईको चेक प्रकृया नगरिएको हुनसक्छ वा तपाई चेकका लागि योग्य नहुन सक्नुहुनेछ भन्ने सन्देश पनि उक्त पेजमा उल्लेख भएको हुन्छ । यदि तपाईले अनलाइनमा चेक गर्दा थप जानकारी आवश्यक भएको भन्ने सुचना पाउनुभयो भने राहत चेक आईआरएसलाई नै फिर्ता गएको हुनसक्छ ।
यो अवस्थामा तपाईलाई आफ्नो सही बैंक एकाउन्ट उल्लेख गर्ने विकल्प दिइएको हुन्छ । तपाईको आफ्नो नाम, बैंक एकाउन्ट र राउटिङ नम्बर उपलब्ध गराउनुपर्छ । फोनबाट विवरण उपलब्ध गराउनका लागि आईआरएसमा फोन सम्पर्क नगर्न सुझाव दिइएको छ ।
दोश्रो, तपाईले सन् २०१९ को ट्याक्स फाइल गरेयता तपाइको सम्पर्क विवरणहरु परिवर्तन भएको हुनसक्छ । महामारीका बेलामा १६ मिलियन अमेरिकनहरु अस्थायी रुपमा बसाईसराई गरेको तथ्यांक रहेको छ । यदि तपाई बसाई सर्नुभएको खण्डमा तपाईको पछिल्लो ठेगाना आईआरएससँग नहुनसक्छ ।
तपाईले हालै सन् २०२० को ट्याक्स फाइल गरिसक्नुभएको भएतापनि तपाईको ट्याक्स फाइल आईआरएसले प्रकृयामा नलगिसकेको हुनसक्छ । मार्च १२ सम्मको अवस्था हेर्दा झण्डै ६७ लाख आवेदनहरु अहिलेपनि ब्याकलगमा रहेका छन् ।
तपाईले आफ्नो परिवर्तन भएको ठेगाना आईआरएसलाई जानकारी दिने विभिन्न तरिकाहरु रहेका छन् । तपाईले सन् २०२० को ट्याक्स फाइल गर्दा अपडेटेड ठेगाना प्रयोग गर्न सक्नुहुनेछ । तपाईले फर्म ८८२२ भरेर आफ्नो ठेगाना परिवर्तनबारे आईआरएसलाई जानकारी दिन सक्नुहुनेछ । त्यस्तै आईआरएसको ठेगानामा तपाईले आफ्नो पूरा नाम, नयाँ र पूरानो ठेगाना, सोसल सेक्युरिटी नम्बर हस्ताक्षर सहित पठाउन पनि सक्नुहुनेछ ।
यदि सरकारले पूरानो ठेगानामा चेक पठाइसकेको भएमा त्यो फर्कदासम्म तपाईले प्रतिक्षा गर्नुपर्छ । चेक फर्केको खण्डमा अनलाइनबाट चेक गर्दा तपाईलाई आफ्नो विवरण भर्ने विकल्प प्रदान गरिनेछ ।
तेश्रो, तपाईले हालै बैंक एकाउन्ट परिवर्तन गर्नुभएको खण्डमा पनि तपाईको राहत चेक प्राप्त नभएको हुनसक्छ । तपाईले डिभोर्स गरेका कारण, बसाई सरेका कारण वा अन्य कुनै कारणले पूरानो बैंक खाता बन्द गरेर नयाँ खोल्नुभएको खण्डमा पनि नयाँ खातामा रकम नआउन सक्छ । किनभने नयाँ खाता आईआरएसको रेकर्डमा नहुनसक्छ ।
यदि तपाईको राहत चेक पुरानो बन्द भएको खातामा आएको खण्डमा बैंकले उक्त चेक सरकारलाई नै फर्काइदिन्छ । यदि तपाईले अनलाइनमार्फत आईआरएसलाई नयाँ एकाउन्ट नदिएको खण्डमा वा उक्त विकल्प नपाएको खण्डमा आईआरएसले चेक फिर्ता भएको केहीदिनमा हुलाकमार्फत तपाईलाई चेक पठाउनेछ ।
चौथो, आईआरएससँग बैंक एकाउन्ट विवरण भएका कतिपयलाई समेत आईआरएसले हुलाकमार्फत चेक पठाएको छ । हुलाकबाट पठाइएको चेक प्राप्त हुन अझै केहीदिन लाग्नसक्छ । महामारी सम्बन्धित ट्याक्स ब्रेक वा अन्य कुनै कारणले तपाईको डाइरेक्ट डिपोजिट गरिएको चेक आईआरएसलाई फिर्ता हुनसक्छ ।
यदि तपाईको चेक हुलाकमार्फत आउँदै छ भने तपाईले अनलाइनमा चेक गर्दा हुलाकमार्फत पठाइएको जानकारी प्राप्त गर्नुहुनेछ । तपाईले धैर्य भएर प्रतिक्षा गर्नुपर्छ ।
पाँचौं, तपाईले राहत चेक हुलाकबाट पाइसकेको तर खाम नचिनेको पनि हुनसक्छ । यदि तपाईले हुलाकबाट पाउने पत्र राखिने स्थान सुरक्षित छैन भने नियमित रुपमा चेक गर्नुहोला । तपाईको राहत चेक हराएको खण्डमा तपाईले अर्को बर्ष ट्याक्स फाइल गर्दामात्र दावी गर्न सक्नुहुनेछ ।
