भिसा स्पोन्सरकर्ताले क्रेडिट स्कोर र ३ बर्षे ट्याक्स रेकर्ड बुझाउनुपर्ने नियम फिर्ता
प्रकाशित मिति : चैत्र ६, २०७७ शुक्रबार
ट्रम्प प्रशासनले गत अक्टोबरमा ग्रिनकार्ड आवेदकलाई स्पोन्सर गर्ने स्पोन्सरकर्तालाई जिम्मबार बनाउन नयाँ नियम प्रस्ताव गरेकोमा उक्त प्रस्तावित नियम बाइडेन प्रशासनले फिर्ता लिएको छ । यो नियम गत अब्टोबर २ मा फेडरल रजिस्टरमा प्रकाशित भएको थियो । र, त्यसपछि यो नियमका लागि ३० दिनको कमेन्ट अवधि दिइएको थियो ।
नियम कार्यान्वयन भइसकेको थिएन । अन्तिम नियम प्रकाशन हुन बाँकी रहेकै अवस्थामा बाइडेन प्रशासनले उक्त नियम फिर्ता गरेको हो ।
यो प्रस्तावित नियम पूर्व राष्ट्रपति डोनाल्ड ट्रम्पले सन् २०१९ को मे २३ मा जारी गरेको मेमोमा आधारित थियो । जसमा स्पोन्सर गर्ने व्यक्तिको कानूनी उत्तरदायीत्वहरु समावेश गरिएको थियो । तर वर्तमान राष्ट्रपति जो बाइडेनको फेबु्रअरी २ को कार्यकारी आदेशका आधारमा यो नियम फिर्ता गरिएको छ । बाइडेनको उक्त कार्यकारी आदेशमा अमेरिकाको अध्यागमन प्रणालीप्रतिको विश्वास कायम गर्ने लगायत उल्लेख छ ।
फिर्ता गरिएको नियममा के थियो ?
यो नियममा स्पोन्सर फर्म आई ८६४ र आई ८६४ ईजी भर्ने स्पोन्सरकर्ताहरुलाई त्यसका नियमप्रति उत्तरदायी बनाउने प्रावधानहरु थिए । अमेरिकी ग्रिनकार्ड आवेदकलाई स्पोन्सर गर्दा स्पोन्सर गरिएको व्यक्तिले सरकारी सुविधा लिएमा त्यसको क्षतिपूर्ति स्पोन्सरकर्ताबाट गराउने नियम रहेको थियो ।
यो नियममा स्पोन्सरकर्ताले क्रेडिट रिपोर्ट, क्रेडिट स्कोर, विगत ३ बर्षको ट्याक्स रिर्टनको प्रमाणित प्रति, बैंक एकाउन्टको विवरण पेश गर्नुपर्ने उल्लेख थियो । स्पोन्सरकर्ताले आवश्यक आम्दानी गरिरहेको प्रमाणित गर्न बैंक एकाउन्टको विवरण पेश गर्नुपर्ने नियममा रहेको थियो ।
यदि स्पोन्सरकर्ताले विगत ३६ महिनाको अवधिमा सरकारी सुविधा लिएको भएमा त्यस्तो कुनै सरकारी सुविधा नलिएको अर्को स्पोन्सरकर्ता समेत आवश्यक पर्ने नियममा उल्लेख थियो । विगतमा कसैलाई स्पोन्सर गरेर उक्त आप्रवासीलाई गर्ने सहयोग गर्न असफल रहेको भएमा पनि को स्पोन्सरको आवश्यकता पर्ने समेत उल्लेख थियो ।
उक्त नियममा स्पोन्सरकर्ताले आफ्नो एकाउन्ट भएको बैंकको नाम, एकाउन्ट नम्बर, राउटिंग नम्बर, बैंक एकाउन्ट होल्डरको नाम लगायतका विवरण समेत बुझाउनुपर्ने उल्लेख थियो । अमेरिकामा आउने व्यक्तिले प्रयाप्त बित्तिय सहायता भएको पुष्टी गर्न स्पोन्सरकर्ताका तर्फबाट यो विवरण अमेरिकी सरकारलाई बुझाउनुपर्ने उक्त नियममा जनाइएको थियो ।
अमेरिकामा प्राय सबै परिवारमा आधारित र केही रोजगारमा आधारित ग्रिनकार्ड आवेदन दिनेहरुका लागि स्पोन्सरको आवश्यकता पर्छ । स्पोन्सरकर्ताले आई ८६४ वा आई ८६४ ईजी भरेर स्पोन्सर गर्नका लागि अमेरिकी सरकारले तोकेको मापदण्ड अनुशारको आम्दानी भएको हुनुपर्ने प्रावधान रहेको छ ।
यस फारमले कानुनी रूपमा बाध्यकारी सम्झौताको रूपमा काम गर्दछ जहाँ अमेरिकाका नागरिक वा ग्रिनकार्डवाहक जसले कुनै व्यक्तिलाई स्पोन्सर गर्छन् । स्पोन्सरकर्ताले कसैलाई स्पोन्सर गर्नका लागि प्रयाप्त आम्दानी हुन जरुरी छ, जुन सामान्यतया संघीय गरिबी गाइडलाइनको १२५ प्रतिशत हुनुपर्छ ।
अहिलेको नियममा स्पोन्सर फर्म भर्दा स्पोन्सरकर्ताले नोटरी गर्न आवश्यक छैन । तर उक्त नियममा स्पोन्सरकर्ताले उक्त फर्म भरिसकेपछि नोटरी गरेको हुनुपर्ने प्रावधान थियो । नयाँ नियम लागु भएको भए अमेरिकामा परिवार, रोजगार वा डिभीमा आधारित व्यक्तिले प्राप्त गर्न निकै मुस्किल हुने अवस्था थियो ।