अग्नि खरेलको राजीनामापछि रमेश बडाल नयाँ महान्यायाधिवक्ता
प्रकाशित मिति : चैत्र ६, २०७७ शुक्रबार
महान्यायाधिवक्ता अग्नि खरेलले पदबाट राजीनामा दिएका छन्। उनले शुक्रबार बिहान प्रधानमन्त्री केपी शर्मा ओलीसँग राजीनामा दिएका हुन्। महान्यायाधिवक्ता कार्यालयमा पत्रकार सम्मेलन गर्दै खरेलले राजीनामा घोषणा गरेका हुन्।
उनले प्रधानमन्त्रीसँग छलफल गरेरै राजीनामा दिएको बताए। उनले पत्रकार सम्मेलनमा २०७४ फागुन ८ गते आफू पदमा नियुक्त भएयता आफूले गरेका कामको फेहरिस्त प्रस्तुत गरेका थिए। उनले उक्त अवधिमा संस्थागत सुधारका लागि विभिन्न कार्य गरेको, संस्थालाई व्यावसायिक बनाउन प्रयास गरेको बताए।
यसैबीच, महान्यायाधिवक्तामा अधिवक्ता रमेश बडाल नियुक्त भएका छन्। प्रधानमन्त्री केपी शर्मा ओलीको सिफारिसमा राष्ट्रपति विद्यादेवी भण्डारीले बडाललाई महान्यायाधिवक्तामा नियुक्त गरेकी हुन्।