पहिले नै ट्याक्स फाइल गरेकाहरुलाई आइआरएसले १० हजार २ सयको ट्याक्स स्वत: रिफण्ड दिने
प्रकाशित मिति : चैत्र ५, २०७७ बिहीबार
अमेरिकी राष्ट्रपति जो बाइडेनले हस्ताक्षर १ दशमलव ९ ट्रिलियन डलरको प्याकेजमा हस्ताक्षर गर्नु अगाडि नै ट्याक्स फाइल गरेका र गतबर्ष बेरोजगारी विमा रकम लिएकाहरुको बेरोजगारी विमाको सुरुको १० हजार २ सय डलरमा लगाइएको ट्याक्स आईआरएसले स्वत रिफण्ड गर्ने भएको छ । आईआरएसका कमिश्नर चक रेटिगले पहिले नै ट्याक्स फाइल गरिसकेकाहरुलाई थप कुनै कदम नचाल्न र आईआरएसले आफै १० हजार २ सय डलरमा लिएको ट्याक्स रिफण्ड गर्ने जानकारी दिएका छन् ।
१ दशमलव ९ ट्रिलियनको राहत प्याकेजले बार्षिक आम्दानी १ लाख ५० हजारभन्दा कम रहेकाहरुको सन्दर्भमा सन् २०२० मा बेरोजगारी विमाको रकम लिएकाहरुका सन्दर्भमा १० हजार २ सय सम्मको रकममा ट्याक्स नलाग्ने व्यवस्था गरेको छ । तर बाइडेनले बिलमा हस्ताक्षर गर्नु अगाडि नै ट्याक्स फाइल गरेकाहरु उक्त छुट कसरी प्राप्त गर्ने भन्ने सन्दर्भमा अन्यौलमा रहेका थिए ।
#IRS strongly urges taxpayers to not file amended returns related to the new legislative provisions in the American Rescue Plan Act until the agency issues additional guidance. https://t.co/mgDlwUGRwj #COVIDreliefIRS pic.twitter.com/TiZobMCfKo
— IRSnews (@IRSnews) March 18, 2021
पहिले नै ट्याक्स फाइल गरेकाहरुले ट्याक्स परिमाजर्न फाइल गर्न वा कुनै कदम चाल्नु नपर्ने भएको छ । रेटिगले बिहिबार कँग्रेसनल प्यानलमा भने – ‘पहिले नै ट्याक्स फाइल गरिसकेकाहरुले ट्याक्स परिमार्जन फाइल नगर्नुहोला । हामी विश्वास गर्छौ कि हामीले यो मामला आफै सल्टाउन सक्षम हुनेछौं । हामी विश्वास गर्छौ कि हामीले १० हजार २ सयसँग सम्बन्धित रिफण्ड स्वत जारी गर्न सक्षम हुनेछौं ।’
रेटिगले ट्याक्स फाइल नगरिसकेकाहरुका सन्दर्भमा कसरी प्रकृयामा लैजाने भन्नेबारे छिट्टै विस्तृत विवरण सार्वजनिक गरिने बताएका छन् । आईआरएसले ट्याक्स फाइल गर्ने अवधि मे १७ सम्म थप गरिसकेको छ ।
सन् २०२० मा बेरोजगारी विमा रकम लिएका तर ट्याक्स फाइल नगरेकाहरुलाई समेत ट्याक्स नलाग्ने १० हजार २ सय डलरको फाइदा लिनका लागि केही समय प्रतिक्षा गर्न आईआरएसले सुझाव दिएको छ । कागजीरुपमा फाइल गर्नेहरुका लागि छिट्टै वर्कसिट उपलब्ध गराउने र अनलाइनबाट फाइल गर्नेहरुका सन्दर्भमा सफ्टवेयर अपडेटका लागि सफ्टवेयर कम्पनीसँग काम गर्ने आईआरएसले जनाएको छ ।
प्रणालीमा अपडेट गरिसकेपछि ट्याक्स फाइल गर्ने व्यक्तिले कसरी बेरोजगारी विमाको ट्याक्स नलाग्ने रकम रिपोर्ट गर्ने भन्ने सन्दर्भमा विकल्पकहरु प्राप्त गर्नेछन् । नयाँ चरणको राहत चेक, बिस्तारित चाइल्ड ट्याक्स क्रेडिट, अगाडि नै प्राप्त गर्न सकिने चाइल्ड ट्याक्स क्रेडिटको रकम र अन्य ट्याक्सका प्रावधानहरु अपडेट गर्ने आईआरएसले जनाएको छ ।
मार्च ५ सम्म आईआरएसले ५६ मिलियन व्यक्तिका ट्याक्स रिटर्नहरु प्राप्त गरेको छ भने ४९ मिलियन व्यक्तिका फाइल प्रकृयामा लगिसकेको छ । गतबर्ष झण्डै ४० मिलियन व्यक्तिले अमेरिकामा बेरोजगारी विमा रकम प्राप्त गरेका थिए । औषतमा एकजना १४ हजार डलर सहायता प्राप्त गरेका थिए ।