आईआरएसले पहिलो चरणमा पठाएको १४ सयको राहत चेक खातामा डिपोजिट
प्रकाशित मिति : चैत्र ४, २०७७ बुधबार
अमेरिकी सरकारको आईआरएसले मार्च १२ शुक्रबार नै करदाताहरुको खातामा १४ सय डलरको राहत चेक पठाएको बताएको थियो । आज उक्त चेक अधिकांशको खातामा प्राप्त भएको छ ।
आईआरएसको अनलाइन प्रणालीमा आफ्नो रकम ट्रयाक गर्दा मार्च १७ डिपोजिट मिति उल्लेख भएकाहरुको राहत चेक आज प्राप्त भएको हो । कतिपय बैंकले भने खातावालाहरुलाई उक्त रकममा अगाडि कै मितिमा पहुच दिएका थिए ।
७५ हजार भन्दा कम बार्षिक आम्दानी भएकाले १४ सय डलर, १ लाख ५० हजार भन्दा कम आम्दानी भएका दम्पत्तिले २८ सय र हरेक डिपेन्डेन्टका लागि १४ सय डलरका दरले रकम प्राप्त गरेका छन् ।
राहत चेक २०१९ वा २०२० को आम्दानीको आधारमा वितरण गरिएको छ । सन् २०२० को ट्याक्स फाइल गरिसकेकाहरुका सन्दर्भमा २०२० कै आम्दानीका आधारमा र नगरेकाहरुको सन्दर्भमा २०१९ को आम्दानीका आधारमा चेक प्रदान गरिएको छ । उदाहरणका लागि दुईवटा बच्चा भएका दम्पत्तिले ५६ सय डलरको चेक पाउँछन् ।
आईआरएससँग बैंक एकाउन्ट नभएकाहरुले भने राहत चेकको रकम पाउन केहीसमय प्रतिक्षा गर्नुपर्नेछ । उनीहरुले डेबीट कार्ड वा कागजको चेकमार्फत रकम पाउनेछन् ।
यसरी गर्नुहोस् ट्रयाक
तपाईको एकाउन्टमा कुन दिन राहत चेक पठाइदैछ ? कुन विधिबाट पठाइदैछ ? कुन एकाउन्टमा पठाइदैछ ? त्यो हेर्नमिल्ने टुल आईआरएसले व्यवस्था गरेको छ ।
आफ्नो राहत चेक कुन बिधिबाट कहिले आउँछ थाहा पाउन यहाँ क्लीक गर्नुहोला ।
क्लीक गरिसकेपछि तपाईले फर्ममा सोसल सेक्युरिटी नम्बर, जन्ममिति, स्ट्रीटको ठेगाना र जीपकोड हाल्नुपर्छ । ठेगाना हाल्दा तपाईले स्ट्रीटको ठेगाना र अपार्टमेन्ट नम्बरमात्र हाल्नुपर्छ । सिटी र स्टेट उल्लेख गर्नुपर्दैन ।
तपाईको घरनम्बर र स्ट्रीट नम्बर हालेपछि अपार्टमेन्ट नम्बर उल्लेख गर्नुपर्छ । उदारहणका लागि तपाई ९७२० ५७ एभिन्युमा बस्नुहुन्छ भने त्यतीमात्र हालेर कमा पछि अपार्टमेन्ट नम्बर उल्लेख गर्नुपर्छ ।
पहिलो र दोश्रो चरणको चेकको स्टाटस हेर्न भने अनलाइनमा एकाउन्ट बनाउन जरुरी हुन्छ ।
रकम प्राप्त गर्नका लागि योग्य व्यक्तिले कुनै कदम चाल्नुनपर्ने जनाइएको छ ।