नेपाल-खनाल भेला : आफूपक्षीय नेता–कार्यकर्तामाथि भएका व्यवहारको विरोध जनाउने
प्रकाशित मिति : फाल्गुन २७, २०७७ बिहीबार
नेपाल कम्युनिष्ट पार्टी (एमाले) ले बैठक बोलाउन चासो नदिइरहेका बेला सो पार्टीको माधवकुमार नेपाल पक्षले भने भेला र छलफललाई निरन्तरता दिइरहेको छ। बिहीबार पनि सो पक्षले आफूपक्षीय स्थायी कमिटी सदस्यहरुको भेला आयोजना गर्यो। भेलाले सर्वोच्च अदालतको फैसलासँगै देशका विभिन्न भागमा भइरहेका पार्टीविरोधी गतिविधिको निन्दा गरेको छ।
नेता नेपाल र झलनाथ खनालपक्षीय स्थायी कमिटी सदस्यहरुको भेलामा नेताहरुले पूर्ववत अवस्थामा फर्किएको नेतृत्वलाई विभिन्न समूहले दुर्व्यवहार गर्न थालेको भन्दै असन्तुष्टि जनाएको हो।
बैठकपछि नेता भीम रावलले भने, ‘सर्वोच्चको फैसलापछि पनि विभिन्न ठाउँमा नेताहरुमाथि दुर्व्यवहार भइरहेको छ। एमालेका नेतालाई हटाएर, एमाले नै नभएका मानिसलाई ल्याएर राखिँदैछ। यो सबै कुरामा हामीले छलफल गरेका छौं।’बुधबार कैलालीको धनगढीमा केपी ओली पक्ष र माधव नेपाल पक्षबीच झडप भएको थियो।
ओली पक्षले पार्टी कार्यालय कब्जा गर्ने, आफ्नो पक्षका नेता–कार्यकर्तालाई अपमानित गर्नेलगायत काम गरेको भन्दै नेपाल–खनाल पक्षले त्यसको लिखित रुपमा विरोध जनाउने जनाएको छ।
एमाले ब्युँतिएपछि पार्टीको औपचारिक बैठक बस्नुपर्नेमा अझैसम्म बैठक नबोलाइएको र सोही कारण आफूहरु अनौपचारिक छलफलमा जुट्नुपरेको पनि बताए।
‘सर्वोच्चको अनपेक्षित फैसलापछि औपचारिक बैठक बस्नुपर्नेमा सामान्य राजनीतिक नैतिकता र सिद्धान्तअनुरुपका क्रियाकलाप पनि भएनन्। त्यसैले हामीले पार्टीको आन्तरिक एकता कमजोर पार्ने काम नहोस् त्यसका लागि कसरी अघि बढ्न सकिन्छ भनेर अनौपचारिक छलफल गरेका हौँ,’ नेता रावलले भने ।