भिसा कुरेका आप्रवासी भिसा आवेदकलाई अमेरिकी भिसा सेवा उच्च अधिकारीका तीन सुझाव
प्रकाशित मिति : फाल्गुन २६, २०७७ बुधबार
अमेरिकी सरकारको विदेश मन्त्रालयको कन्सुलर अफेयर्स अन्तरगत भिसा सेवाका लागि एक्टीङ डेपुटी एसिस्टेण्ट सेक्रेटरी जुली एम स्टफ्टले अन्तरवार्ता र भिसा कुरेका आप्रवासी भिसा आवेदकलाई तीन सुझाव दिएकी छन् । कोरोनाको महामारीका कारण अमेरिकी दूतावास र कन्सुलेटहरुमा भिसा सेवा प्रभावित भइरहेको सन्दर्भमा वैदेशिक संचार केन्द्रमा आयोजिक एक अन्तरकृयामा उनले भिसा सेवालाई सहज बनाउन यस्ता सुझावहरु दिएकी हुन् ।
पहिलो, नजिकको दूतावास र कन्सुलेटको वेवसाइट नियमित रुपमा हेर्न र यसबाट आवश्यक सुचनाहरु लिन सहज हुने उनको सुझाव छ । वेवसाइटमा सबैभन्दा पछिल्लो अपडेट हुने तथा दूतावास वा कन्सुलेटससँग सम्पर्क गर्नका लागि उचित तरिकाबारे सुचना हुने उनले जानकारी दिइन् ।
दोश्रो, दूतावाससँग भएको आवेदकको इमेल ठेगाना सही भएको सुनिश्चित गर्न उनले सुझाव दिएकी छिन् । उक्त ठेगानामा आवेदकले चाल्नुपर्ने कदमबारे जानकारी दिइने उनले बताइन् । यदि नभएको खण्डमा र कुनै प्रश्न भएमा नजिकको दूतावासमा सम्पर्क गर्न तर त्यसका लागि बारम्बार नभई एकपटकमात्र इमेल पठाउन उनले सुझाव दिएकी छिन् ।
इमेल पठाउँदा केस नम्बर पनि समावेश गर्न उनको सुझाव छ । केस नम्बर भएको खण्डमा आवेदकको आवेदन पत्ता लगाउन सजिलो र प्रभावकारी हुने भएकाले केस नम्बर समावेश गर्नुपर्ने उनको भनाई छ । दूतावास वा कन्सुलेटमा एउटै प्रश्नलाई लिएर बाम्बार फोन र इमेल गर्दा सबैका लागि प्रकृयामा ढिलो हुने उनले बताइन् ।
तेश्रो, अन्तरवार्तामा आउँदा अप्वाइन्टमेन्ट लेटरमा उल्लेख भएका सबै कागजातहरु लिएर आउन उनले सुझाव दिएकी छिन् । कागजात नपुगेर बारम्बार अप्वाइन्टमेन्ट तय गर्नुपर्ने अवस्थामा आएका उक्त आवेदकका लागिमात्र नभई अरु आवेदकका भिसा प्रकृयामा समेत ढिलाई हुन जाने भएकाले कागजातहरु ठीक तरिकाले मिलाएर ल्याउन उनले सुझाव दिएकी छिन् ।