माओवादी केन्द्रले कांग्रेस र जसपासँग वार्ता गर्ने, जसपाले उधारो नमान्ने
प्रकाशित मिति : फाल्गुन २५, २०७७ मंगलबार
नेपाल कम्युनिष्ट पार्टी (माओवादी केन्द्र) ले आगामी रणनीति तय गर्न नेपाली कांग्रेस र जनता समाजवादी पार्टीसँग वार्ता गर्ने भएको छ।
पार्टी मुख्यालय पेरिसडाँडामा बसेको स्थायी कमिटी बैठकले यस्ताे निर्णय गरेको हो। बैठकले सरकार गठन र संसदमा कसरी प्रस्तुत हुने भन्ने विषयमा कांग्रेस र जसपासँग वार्ता गर्ने भएको हो।
बैठकले यही फागुन २९ गते केन्द्रीय कमिटी बैठक बोलाउने निर्णय गरेको छ। तर सबैतिर चासोको विषय बनेको केपी ओली नेतृत्वको सरकारलाई समर्थन फिर्ता लिने विषयमा भने बैठकले कुनै निर्णय गरेन।
उता जनता समाजवादी पार्टीले सबै पार्टीसँग वार्ता गर्न तयार रहे पनि कसैसँग उधाराे सम्झौता नगर्ने स्पष्ट पारेकाे छ। मंगलबार संसदीय दलकाे बैठकपछि नेता राजेन्द्र महतोले उधारो सम्झौता गरेर सरकारमा नजाने बताए।
सबैसँग वार्ताका लागि पार्टी खुला रहे पनि अब आफ्ना माग र मुद्दालाई केन्द्रमा राखेर वार्ता गरिने उनले जानकारी दिए। उनले संविधान संशोधन, रेशम चौधरीलगायतलाई रिहाईलगायतका आफ्ना मुद्दा रहेको बताए।
‘विगतका अनुभवबाट पाठ सिक्दै आगामी दिनमा पार्टीले निर्णय गर्छ, तर अब कसैको बेइमानी चल्नेवाला छैन, उधारो खेती हुँदैन,’ उनले भने।