अध्यागमन जेलमा रहेका आप्रवासीहरुका लागि नयाँ पुनरावलोकन प्रकृया, जेलमा ७९ नेपाली

खसोखास अमेरिका ब्यूरो

---

प्रकाशित मिति : फाल्गुन २३, २०७७ आईतबार

टेक्सासको पोर्ट इसाबेल डिटेन्सन सेन्टर । फोटो: किशोर पन्थी

अमेरिकाको इमिग्रेशन एण्ड कस्टम इन्फोर्समेन्ट आइसले अध्यागमन जेलमा रहेका आप्रवासीहरुका लागि अब नयाँ पुनरावलोकन प्रकृयाको घोषणा गरेको छ । आफ्नो मुद्दा आइसको कारवाही, हिराशत र देशनिकालाको प्राथमिकतामा नपर्ने विश्वास गरेकाहरुले अब आफ्नो मुद्दा पुनरावलोकनका लागि अपिल गर्न पाउने भएका छन् ।

नयाँ अपिल पकृया अनुशार आप्रवासी र उनीहरुका वकिलहरुले आइसले गरेको पक्राउ, थुना र देशनिकालाबिरुद्ध वकालत गर्न पाउनेछन् । वासिंटन डिसीमा रहेका बरिष्ठ पुनरावलोकन अधिकारीले नेतृत्व गरेको नयाँ प्रकृया कसलाई पक्राउ गर्ने र देशनिकाला गर्ने भन्ने सन्दर्भमा आइसलाई सुधार गर्ने प्रयासका रुपमा आएको हो ।

नोभेम्बरपछि सिमा पार गरेका, राष्ट्रिय सुरक्षामा खतरा रहेका र सार्वजनिक सुरक्षामा खतरा रहेकाहरुलाई देशनिकालाको प्राथमिकतामा राख्नका लागि आइसका अधिकारीहरुलाई दिइएको निर्देशनको केही सातामा नै यो नयाँ प्रकृयाको थालनी गरिएको हो ।

आप्रवासी र वकिलहरुले यसअगाडि पनि स्थानीय स्तरमा पक्राउ, थुना र देशनिकालाबिरुद्ध चुनौती पेश गर्न पाउने प्रावधान रहेपनि नयाँ प्रकृयाले अब स्थानीय अधिकारीले अनुरोध अस्वीकार गरेको खण्डमा समेत आइसको मुद्दा पुनरावलोकन प्रकृयामार्फत छुट्टै अपिल गर्न पाइने भएको छ । यसअगाडि स्थानीय स्तरमा गरिने अपिल क्षेत्रीय अधिकारीहरुको माताहतमा रहेको थियो ।

अपिल गरिसकेपछि आइसका पुनरावलोकन अधिकारीहरुले उक्त मामला नयाँ गाइडलाइन अनुशार भए नभएको हेर्नेछन् । पुनरावलोकनपछि १ नोभेम्बर २०२० अगाडि नै प्रवेश गरेको, राष्ट्रिय र सार्वजनिक सुरक्षामा खतरा नरहेको पाइएमा त्यस्ता व्यक्ति बिरुद्ध फरक खालको निर्णय हुनसक्नेछ । आप्रवासीहरुले अध्यागमन हिराशतबाट रिहा, अध्यागमन अदालतमा उपस्थीत हुनुपर्ने नोटिस टु अपियर रद्द वा देशनिकाला स्थगन लगायतका निर्णयहरु प्राप्त गर्न सक्नेछन् ।

नयाँ पुनरावलोकन प्रकृयाका लागि पहिले नै हिराशतमा रहेका र आसन्न देशनिकालाको सामना गरिरहेकाहरुलाई प्राथमिकता दिइने भएको छ ।

हिराशतमा रहेकाहरुको मामला पुनरावलोकनका लागि अनुरोध गर्न चाहनेहरुले प्रारम्भिक पुनरावलोकनका लागि स्थानीय इन्फोर्समेन्ट एण्ड रिमुभल फिल्ड अफिसमा नै सम्पर्क गर्नुपर्ने आइसले जनाएको छ । त्यसपछि अनुरोधका आधारमा बरिष्ठ अधिकारीले मामलाको पुनरावलोकन गर्नेछन् ।

स्थानीय फिल्ड अफिसमा सम्पर्क गर्नका लागि यहाँ क्लीक गर्नहोला ।

स्थानीय फिल्ड अफिसमा सम्पर्क गरिसकेपछि पुनरावलोकनका लागि अनुरोध गर्न यहाँ क्लीक गर्नुहोला ।  वा [email protected] मा इमेल गर्नुहोला ।

तर पुनरावलोकनका लागि बरिष्ठ अधिकारीहरुलाई अनुरोध गर्नु अगाडि स्थानीय फिल्ड अफिसमा सम्पर्क सम्पर्क गरेर पुनरावलोकनका लागि अनुरोध नगरेको खण्डमा भने केसमा ढिलाई हुनसक्ने जनाइएको छ । अनुरोध गर्दा व्यक्तिको एलियन नम्बर, फोन नम्बर, इमेल र अन्य विवरणहरु पठाउन सुझाव दिइएको छ ।

सम्बन्धितबाहेक अन्य व्यक्तिलाई जानकारी प्रदान गर्नका लागि फर्म जी २८ वा आइसको फर्म आई -६० – ००१ भर्न सुझाव दिइएको छ ।

अध्यागमन जेलमा ७९ नेपाली

न्युयोर्क, टेक्सास, क्यालिफोर्निया लगायतका राज्यमा दर्जन बढी इमिग्रेशन जेलमा नेपालीहरु रहेका छन् । अमेरिकी अध्यागमन जेलमा रहेका नेपालीहरुमध्ये अधिकांश मेक्सिकोको सिमाक्षेत्रहुँदै गैरकानुनी रुपमा अमेरिका छिर्ने क्रममा पक्राउ परेका कागजपत्रविहिनहरु हुन् ।

उनीहरुमध्ये अधिकांशले अमेरिकामा एसाइलमको दावी गरेपनि कतिपयले भने त्यसको दावी अस्वीकार भएकाले देशनिकालाको आदेश पाइसकेका छन् । कतिपयको मुद्दा अध्यागमन अदालतबाट अस्वीकार भएर बोर्ड अफ इमिग्रेशन अपिलमा पनि चलिरहेको छ । कतिपयको भने पासपोर्ट लगायतका ट्राभल डकुमेन्टहरु नबनेका कारण देशनिकाला हुनबाट बचेका छन् ।

आइसका प्रवक्ता डेनियल बेनेटले खसोखासलाई दिएको जानकारी अनुशार अहिले अध्यागमन जेलमा ७९ जना नेपालीहरु रहेका छन् । उनीहरुमध्ये एकबर्ष वा त्योभन्दा लामो समयदेखि अध्यागमन जेलमा रहेकाहरुको संख्या पनि उल्लेख्य रहेको छ । कोरोनाको महामारी र ट्रम्प प्रशासनले अध्यागमनमा गरेको कडाईका कारण पछिल्लो चरणमा सिमाक्षेत्रबा आउने नेपालीहरुको संख्या निकै कम छ । जर्जिया, एरिजोना र अलाबामाको अध्यागमन जेलमा समेत उल्लेख्य नेपालीहरु छन् ।

ट्रम्प प्रशासनले सन् २०१७ को फेबु्रअरीमा क्याच एण्ड रिलिज नीतिको अन्त्य गरेपछि अध्यागमन जेलमा परेकाहरुलाई एसाइलमको मुद्दा नजितेसम्म रिहा गर्न छाडिएको थियो । त्यो भन्दा अगाडि ओबामा प्रशासनको बेलामा भने कैयन नेपालीहरु जीपीएस लगाएर वा स्पोन्सरकर्ताको जिम्मा लगाएर सुपरभिजनमा रिहा भएका थिए ।

कानून व्यवसायी रमेश श्रेष्ठ भन्छन् – ‘ट्रम्प प्रशासनले क्याच एण्ड रिलिजको नीति अन्त्य गरेपछि सुपरभिजनमा रिहा गर्ने क्रम बन्द भयो । नेब्रास्कामा रहेका एकजना नेपालीलाई सन् २०१७ मा सुपरभिजनमा छाड्ने तयारी अन्तिम चरणमा थियो । तर ट्रम्पको नीतिका कारण उनी रिहा भएनन् । पछि उनलाई आइसले देशनिकाला गरेर नेपाल फिर्ता पठायो ।’

सन् २०१५ को जुन २४ भन्दा अगाडि अमेरिका आएका र अध्यागमन जेलमा परेकाहरुलाई टीपीएसले संरक्षण प्रदान गरेको थियो । त्यसपछि पनि सन् २०१७ को जनवरीसम्म अध्यागमन जेलमा भएका नेपालीहरु ठूलो संख्यामा धरौटी र नजिकका आफन्त स्पोन्सरकर्ताको जिम्मा लगाएर सुपरभिजनमा रिहा भए । तर ट्रम्प प्रशासन आइसकेपछि भने यो क्रम लगभग अन्त्य भयो । तर अहिले अध्यागमन जेलमा रहेका नेपालीहरुमा रिहा हुने आशा पलाएको छ ।