प्रतिनिधिसभा बैठकमा अध्यादेश विवाद : प्रचण्ड–माधवबाट बहिस्कार, कांग्रेसको नाराबाजी
प्रकाशित मिति : फाल्गुन २३, २०७७ आईतबार
आठ महिनापछि बसेको प्रतिनिधिसभाको सातौं अधिवेशनको पहिलो बैठक नै अवरुद्ध भएको छ। संवैधानिक परिषद्सम्बन्धी अध्यादेशले बैठकमा प्रवेश पाएपछि नेपाली कांग्रेसको विरोधका कारण अवरुद्ध भएको हो।
विरोधका बीच कानुनमन्त्री लिलानाथ श्रेष्ठले अध्यादेश पेश गरेका थिए। त्यसलगत्तै नेपाली कांग्रेस तथा जनता समाजवादी पार्टीका सांसदहरुले रोष्ट्रमअघि उभिएर अध्यादेश फिर्ता लिन माग गर्दै नाराबाजी गरेका थिए।
विरोधपछि सभामुख अग्निप्रसाद सापकोटाले १० मिनेटका लागि बैठक स्थगित गरेका थिए। तर, अध्यादेशबारे दलहरूबीच सहमति जुट्न नसकेपछि २६ गते १ बजेसम्मका लागि बैठक स्थगित गरिएको सूचना टाँसियो।
सभामुखले १० मिनेटका लागि स्थगन गर्नुअघि नेकपाको प्रचण्ड–माधव पक्ष बैठक बहिस्कार गरेर बाहिर निस्किएको थियो।
बैठक सुरु भएपछि नेपाल कम्युनिष्ट पार्टी (नेकपा)को प्रचण्ड–माधव पक्षका नेता भीम रावलले वैधता नै गुमाइसकेको सरकारले गरेका निर्णय संसदमा प्रवेश गराइएको भन्दै आपत्ति जनाएका थिए।
कानुनी, राजनीतिक र संवैधानिक दृष्टि तथा सर्वोच्चले गरेको फैसलाको दृष्टिले यो सरकार कुनै पनि दृष्टिले वैध होइन र वैध रहँदैन,’ उनले भने, ‘वैधता नै गुमाइसकेको सरकारले गरेको निर्णय संसदमा प्रवेश गर्न मिल्दैन।’
कांग्रेस सांसदहरु पुष्पा भुसाल र बालकृष्ण खाँडले पनि सरकारले मुलुकलाई नियन्त्रण गर्ने हिसाबले ल्याएको अध्यादेश फिर्ता लिनुपर्ने माग गरेका थिए।