बेरोजगारी विमा रकमको सुरुको १० हजार २ सयको ट्याक्स तिर्न नपर्ने
प्रकाशित मिति : फाल्गुन २२, २०७७ शनिबार
शनिबार सिनेटबाट पारित राहत प्याकेजमा सन् २०२० मा बेरोजगारी विमा रकम लिएकाहरुलाई थप खुशीको खबर छ । कोरोना महामारीका कारण गतबर्ष धेरैले काम गुमाएका कारण बेरोजगारी विमा वा महामारी बेरोजगारी सहायता रकम लिएका थिए । अब राहत प्याकेज हाउसबाट पारित भएर राष्ट्रपतिले हस्ताक्षर गरेपछि उनीहरुले सुरुको १० हजार २ सय डलरको ट्याक्स तिर्न नपर्ने भएको छ ।
कतिपयले बेरोजगारी विमा रकम लिंदा ट्याक्स वीथहोल्ड गरेर बाँकी रकममात्र लिएका थिए भने कतिपयले पूरै रकम लिएका थिए । सुरुको १० हजार २ सय डलरसम्मको सुविधाका लागि ट्याक्स वीथहोल्ड गरेकाहरुले उक्त रकम फिर्ता पाउने भएका छन् भने वीथहोल्ड नगरेकाहरुले उक्त रकममा लागि ट्याक्स तिर्नु नपर्ने भएको छ ।
तर त्यसका लागि आम्दानीको थ्रेसहोल्ड तोकिएको छ । बार्षिक १ लाख ५० हजारभन्दा कम आम्दानी हुनेहरुलेमात्र उक्त छुट प्राप्त गर्नेछन् । त्योभन्दा माथि आम्दानी हुनेहरुका सन्दर्भमा भने यो छुट दिइनेछैन । अप्रिल १५ भन्दा अगाडि नै बेरोजगारी विमा रकम लिएकाहरुले ट्याक्स फाइल गर्दा यो सुविधा पाउने जनाइएको छ ।
सन् २०२० मा झण्डै ४० मिलियनले बेरोजगारी विमा सुविधा प्राप्त गरेका थिए । जसमध्ये झण्डै ४० प्रतिशतले ट्याक्स वीथहोल्ड गरेर बाँकी रकम लिएका थिए । विभिन्न राज्यहरुले १० प्रतिशतसम्म ट्याक्स वीथहोल्ड गर्नमिल्ने विकल्प दिएका थिए भने कतिपय राज्यहरु त्यस्तो विकल्प दिन असफल भएका थिए ।
मेरिल्याण्ड र डेलावरले सन् २०२० को बेरोजगारी विमा रकमका लागि राज्यको कर मिनाहा गर्ने कानून पारित गरेका छन् । अन्य केही राज्यहरुले पनि कर मिनाहाको सुविधा दिने अपेक्षा गरिएको छ ।
त्यस्तै राहत प्याकेजमा राष्ट्रपतिले हस्ताक्षर गरेपछि सेप्टेम्बर ६ सम्म नै बेरोजगारी विमाका अतिरिक्त संघीय सरकारका तर्फबाट साप्ताहिक ३ सय प्राप्त हुनेछ ।