ओली समूहले भन्यो–प्रचण्ड–माधव पक्षको पत्राचारको कुनै औचित्य छैन
प्रकाशित मिति : फाल्गुन २१, २०७७ शुक्रबार
प्रधानमन्त्री केपी शर्मा ओलीलाई कारबाही गरिएको भन्दै प्रचण्ड–माधव समूहले संसद सचिवालयलाई पत्र लेखेपछि ओलीपक्षले त्यसको जवाफ दिएको छ। ओलीपक्षीय प्रमुख सचेतक विशाल भट्टराईले शुक्रबार विज्ञप्ति जारी गर्दै प्रचण्ड–माधव पक्षको पत्राचारको कुनै कानुनी आधार नभएको जनाएका हुन्।
उनले विज्ञप्तिमा भनेका छन्, ‘यस दलको विधान २०७५ बमोजिम विधिवत रुपमा चुनिनु भएका संसदीय दलका नेता पार्टीका प्रथम अध्यक्ष तथा प्रधानमन्त्री केपी ओली रहनु भएको छ। नेपालको संविधानको प्रचलित कानुनबमोजिमबाहेक कोही कसैले कुनै गैरकानुनी र गैरसंवैधानिक निर्णय गरिएको भनी गरिएको पत्राचारको कुनै कानुनी आधार, औचित्य र प्रभाव हुन सक्दैन।’
उनले नेकपा संसदीय दलको नेतामा प्रधानमन्त्री केपी ओली, उपनेतामा सुवास नेम्वाङ, मुख्य सचेतकमा विशाल भट्टराई, सचेतकमा शान्ता चौधरी रहेकाले संंघीय संसद, संसद सचिवालयलगायतमा कुनै द्विविधि र भ्रम उत्पन्न नहोस् भनेका छन्।