प्रचण्ड–माधव पक्ष : प्रचण्ड संसदीय दलको नेता चयन
प्रकाशित मिति : फाल्गुन २१, २०७७ शुक्रबार
नेपाल कम्युनिस्ट पार्टी (नेकपा) को प्रचण्ड–माधव समूहका अध्यक्ष पुष्पकमल दाहाल ‘प्रचण्ड’ संसदीय दलको नेतामा चयन भएका छन्। सिंहदरबारस्थित संसद सचिवालयमा बसेको संसदीय दलको बैठकले प्रचण्डलाई दलको नेतामा चयन गरेको हो।
दलको बैठकमा १११ जना उपस्थित भएको र अन्य चार जनाले निर्णयमा हस्ताक्षर गर्ने सहमति जनाएको नेताहरुले सो पक्षका नेताहरुले जानकारी दिएका छन्।
नेकपाको प्रतिनिधिसभामा १७२ र राष्ट्रियसभामा ४९ सांसद छन्। सो समूहले आफ्नो पक्षमा स्पष्ट बहुमत रहेको दाबी गरेको छ।
यसअघि पनि प्रतिनिधिसभा विघटनलगत्तै सो समूहको बैठकले प्रचण्डलाई संसदीय दलको नेता चयन गरेको थियो।
प्रचण्ड–माधव पक्षले प्रधानमन्त्री केपी शर्मा ओलीले फागुन २३ सम्म राजीनामा नदिए उनीविरुद्ध अविश्वास प्रस्ताव दर्ता गर्ने तयारी गरेको छ।
प्रधानमन्त्रीको व्यंग
शुक्रबार बसेको प्रचण्ड–माधव पक्षको संसदीय दलको बैठकप्रति प्रधानमन्त्री केपी ओलीले व्यंग गरेका छन्। विप्लव नेकपा र सरकारबीचको हस्ताक्षर कार्यक्रमपछि सम्बोधन गर्दै ओलीले प्रचण्ड–माधव पक्षको शुक्रबार बसेको संसदीय दलको बैठक कुन दलको हो भनेर थाहा नभएको बताए।
उनले भने–संसदीय दलको बैठक बस्दैछ भनेको सुनेको छु, संसदीय दलको नेता म यहाँ छु, कुन दलको बस्यो थाहा छैन।’