आगामी सातादेखि अमेरिकी दूतावास काठमाडौंले विद्यार्थी भिसा जारी गर्ने
प्रकाशित मिति : फाल्गुन २०, २०७७ बिहीबार
आगामी सातादेखि अमेरिकी दूतावास काठमाडौंले विद्यार्थी भिसाका लागि अन्तरवार्ताको मिति दिन सुरु गर्ने भएको छ । तर कोरोना महामारीका कारण नियमित भिसा सेवा सुचारु नभएका कारण सिमित संख्यामामात्र अन्तरवार्ताका अप्वाइन्टमेन्टहरु दिइने भएको छ ।
आगामी सातादेखि एफ, एम र जे भिसाका आवेदकहरुलाई अमेरिकी दूतावास काठमाडौंले भिसा अप्वाइन्ट दिने भएको हो । त्यस्तै अस्थायी कामदार भिसाका अप्वाइन्टमेन्ट पनि दिन सुरु गरिने जनाइएको छ । नियमित भिजिटर भिसाका लागि कहिलदेखि अप्वाइन्टमेन्ट सुरु गर्नेभन्नेबारे दूतावासले अहिलेसम्म केही बताएको छैन । तर विगतमा भिजिटर भिसा भएकाहरुको भिसा समाप्त भएको २ बर्ष ननाघेको खण्डमा भने नविकरण गरिरहेको छ ।
अहिलेसम्म काठमाडौंमा रहेको अमेरिकी दूतावासले विद्यार्थी भिसा जारी नगरेपछि नेपालीहरु दिल्ली र अन्य दूतावासबाट विद्यार्थी भिसा लिइरहेका छन् । जनवरीमा दिल्लीमा रहेको अमेरिकी दूतावासमार्फत अमेरिकाको विद्यार्थी भिसा लिने नेपालीहरुको संख्या उल्लेख्य रहेको थियो । काठमाडौंमा रहेको अमेरिकी दूतावासले एकजनालाईमात्र विद्यार्थी भिसा जारी गरेपनि जनवरीमा विद्यार्थी भिसा पाउने नेपालीहरुको कुल संख्या भने १ सय ११ रहेको थियो । उनीहरुका ५ जना डिपेण्डेण्टहरुले समेत भिसा पाए ।
आप्रवासी भिसा आवेदकलाई नोटिफिकेशन कुर्र्न सुझाव
डिभी २०२१ का विजेता लगायत अन्य आप्रवासी भिसा आवेदकलाई भने अप्वाइन्टमेन्ट तय भएको नोटिफिकेशन कुर्न र धैर्य रहन अमेरिकी दूतावास काठमाडौंले सुझाव दिएको छ । पहिले नै अन्तरवार्ता भइसकेका तर कार्यकारी आदेशका कारण भिसा अस्वीकृत भएका आप्रवासी भिसा आवेदकहरुलाई अब चाल्नुपर्ने कदमबारे दूतावासले सुचित गर्ने जनाएको छ ।
‘हामीले २०२१ का डाइभर्सिटी भिसा आवेदकहरुसहित आप्रवासी भिसा आवेदकलाई धैर्य रहन र अप्वाइन्ट तय भएको सुचना प्राप्त नहुँदासम्म पर्खन प्रोत्साहित गर्दछौं । पहिले नै अन्तरवार्ता भएर राष्ट्रपतिको कार्यकारी आदेश १००१४ का कारण भिसा अस्वीकृत भएकाहरुले अब चाल्ने कदमका सन्दर्भमा दूतावासबाट निर्देशनहरुको प्रतिक्षा गर्नुपर्छ ।’ – दूतावासकी प्रवक्ता अन्ना रिची एलेनले खसोखासलाई जानकारी दिइन् ।
ग्राहक र कर्मचारीहरुको सुरक्षा र स्वास्थ्यको संरक्षणका लागि लागु गरिएका मापदण्डहरुका कारण दूतावासको अप्वाइन्टमेन्ट निर्धारण क्षमता सिमित रहेकोबारे सबै भिसा आवेदकहरु समेत हुनुपर्ने प्रवक्ताको भनाई छ । सेवा सुचारुबारे अमेरिकी विदेशमन्त्रालयको निर्देशिका अनुशार आप्रवासी भिसाका अप्वाइन्टमेन्टहरु सकेजति तय गर्ने कामलाई निरन्तरता दिने दूतावासले जनाएको छ ।
दूतावासले यसबारेका वेवसाइटमा पनि सुचना राखेको छ । आवेदक र कर्मचारीहरु दुबैका लागि सुरक्षित हुने तरिकाले अमेरिका र नेपालबीचको यात्रा सहज बनाउन तथा पूरै भिसा सेवा संचालन गर्न दूतावासले काम गरिरहेको वेवासाइटमा प्रकाशित सुचनामा उल्लेख छ । तर दूतावासले कहिलेदेखि नियमित भिसा सेवा संचालन गर्ने भन्नेबारे केही बताएको छैन ।
गैरआप्रवासी भिसाहरुको सन्दर्भमा अन्तरवार्ता विना नै नविकरण गरिने भिजिटर भिसा, हवाई तथा जल यातायातका कर्मचारीको भिसा, मेडिकल वा अन्य आपतकालिन अवस्थामा यात्रा गर्नुपर्नेहरुका लागि गैरआप्रवासी भिसा जारी भइरहेको दूतावासले जनाएको छ ।
गैर आप्रवासी भिसाका आवेदकहरुका सन्दर्भमा भिसा शुल्क सन् २०२२ को सेप्टेम्बर ३० सम्म अद्यावधिक रहने र उक्त अवधिसम्मको भिसाका लागि सोही देशमा प्रयोग गर्न सकिने दूतावासले जनाएको छ ।
जनवरीमा कतिले पाए भिसा ?
जनवरी २०२१ मा ४३७ नेपालीहरुले अमेरिकाको आप्रवासी भिसा प्राप्त गरे । जसमध्ये सबैभन्दा धेरै अमेरिकी नागरिकका नेपाली दम्पत्तिहरु ३७३ जनाले भिसा प्राप्त गरे ।
त्यस्तै अमेरिकी नागरिकका छोराछोरीहरु र बुबाआमाहरु २८ जना नेपालीहरुले जनवरीमा अमेरिकाको आप्रवासी भिसा पाए । काठमाडौंमा रहेको अमेरिकी दूतावासलेमात्र जनवरीमा ४३६ जनालाई अमेरिकाको आप्रवासी भिसा जारी गरेको अमेरिकी सरकारको विदेश मन्त्रालयले ब्यूरो अफ कन्सुलर अफेयर्सले जनाएको छ ।
त्यस्तै अमेरिकी दूतावास काठमाडौंले जनवरीमा ४३० जनालाई भिजिटर लगायतका गैरआप्रवासी भिसा जारी गरेको छ । जनवरीमा काठमाडौं दूतावासबाट भिजिटर भिसा पाउनेहरु ४१२ जना रहेका छन् । उनीहरु प्राय विगतको भिजिटर भिसा नविकरण गर्नेहरु हुन् । त्यो बाहेक एकजना विद्यार्थी भिसा र ३ जनाले मंगेतर भिसा प्राप्त गरे ।
जनवरीमा काठमाडौं लगायत अन्य दूतावास र कन्सुलेटबाट अमेरिकाको गैरआप्रवासी भिसा पाउने नेपालीहरुको संख्या ५९६ रहेको छ । यसरी जनवरीमा कुल १०३३ नेपालीहरुले अमेरिकाको आप्रवासी र गैरआप्रवासी भिसा प्राप्त गरेका छन् ।