अभियुक्तले अपराध स्वीकारेपछि बलात्कारपछि हत्या गरिएकी भागरथी भट्टको अन्त्येष्टि
प्रकाशित मिति : फाल्गुन ७, २०७७ शुक्रबार
बलात्कारपछि हत्या गरिएकी बैतडीको दोगडाकेदार गाउँपालिका–७ चडेपानीकी १७ वर्षीया भागरथी भट्टको आज अन्त्येष्टि गरिएको छ । मृत भेटिएकी १७ औँ दिनमा आज उनका आफन्तले शव बुझेपछि महाकाली आर्यघाटमा अन्त्येष्टि गरिएको हो ।
बलात्कारी र हत्यारा पत्ता नलागेसम्म आफन्तले शव नबुझ्ने अडान लिएकाले भागरथीको शव बैतडीको शवगृहमा राखिएको थियो । प्रहरीले बुधबार दिनेश भट्टलाई घटनामा संलग्न रहेको भन्दै सार्वजनिक गरिसकेको छ ।उनले बलात्कार र हत्या गरेको स्वीकारेको प्रहरीको दावी छ ।
भागरथीको शव परीक्षण रिपोर्टमा बलात्कारपछि हत्या भएको उल्लेख थियो । सुरुम दिनेशले आफूले भागरथीको हत्यामात्रै गरेको बताउँदै आएका तर पछि बलात्कार गरी हत्या गरेको स्वीकारेको प्रहरी दावी छ ।
अभियुक्तले पछिल्लो पटक आफ्नै बुबाका अगाडि बलात्कारपछि हत्या गरेको बयान दिएका थिए । त्यसपछि मात्रै भागरथीका आफन्तले शव बुझ्न मानेका हुन् । पीडित परिवारले अझै पनि अनुसन्धान निष्पक्षरुपमा गर्न आग्रह गरेका छन् ।
बुधबार नै भागरथीका दाइ शङ्कर भट्टले दिनेशका विरुद्ध कर्तव्य ज्यान र बलात्कारसम्बन्धी कसुरमा कारर्वाहीका लागि जाहेरी दर्ता गरिसकेका छन् । भागरथी र दिनेश एकै गाउँ चडेपानीका हुन् । नाताले दुवै दिदीभाइ पर्छन् । दोगडाकेदार गाउँपालिका–३ श्रीकोटस्थित सनातन धर्म माविमा भागरथी कक्षा १२ र दिनेश कक्षा ११ मा पढ्थे ।
गत माघ २१ गते विद्यालयबाट घर फर्किएकी भागरथी साँझ घर नफर्केपछि खोजतलास गर्दै जाँदा माघ २२ गते स्थानीय लबलेक जङ्गलमा वीभत्स र निर्वस्त्र अवस्थामा फेला परेकी थिइन् । घटनाको अनुसन्धानका लागि सुदूरपश्चिम प्रदेश प्रहरी कार्यालयका प्रमुख प्रहरी नायब महानिरीक्षक डिआइजी उत्तमराज सुवेदी नेतृत्वको टोली खटिएको थियो ।