कोभिड संक्रमणपछि निमोनियाका कारण बेलायतमा यमकली थापाको निधन
प्रकाशित मिति : फाल्गुन ३, २०७७ सोमबार
बेलायतमा ७९ वर्षीया यमकली थापाको कोभिड संक्रमणपछि निमोनियाका कारण उपचारकै क्रममा निधन भएको छ ।
कोभिड संक्रमण भएर दुई साताअघि अल्डरसटनजिक फ्रिमली पार्क अस्पताल भर्ना भएकी थापाको शनिबार राती साढे ११ बजे निधन भएको छोरी नेपाली समुदायकी अभियन्ता शान्ति थापा कुंवरले जानकारी दिइन् ।
‘कोभिड लागेर अस्पताल भर्ना हुनुभएको हो । अस्पतालमा केही दिन बसेपछि कोभिड निको भएर घर ल्याउने तयारी हुदै थियो । त्यही बेला फेरि श्वासप्रश्वासमा समस्या शुरु भयो । कोभिड निको भएपनि निमोनियाका कारण उहाँको निधन भयो भनेर अस्पतालले हामीलाई बताएको छ’, उनले भनिन् ।
बेलायतको नर्थ क्याम्पमा कान्छी छोरी शिवानीसंग बस्दै आएकी यमकलीका पूर्व गोर्खा पतिको झण्डै १० वर्षअघि नै निधन भइसकेको छ । उनका तीन छोरी र एक छोरामध्ये दुई छोरी बेलायतमा छन् भने एक छोरी र छोरा नेपालमै छन् ।
जेठी छोरी शान्ति थापा कुंवर बेलायतको नेपाली समुदायमा सुपरिचित सामाजिक अभियन्ता हुन् । एनआरएनए आइसीसी सदस्य, एनआरएनए यूके उपाध्यक्ष लगायतका जिम्मेवारी उनले निर्वाह गरिसकेकी छन् ।
नेपालमा भैरहवा घर भएकी स्वर्गीय थापा विगत डेढ दशकदेखि बेलायतमै बस्दै आएकी थिइन् । उनलाई यसअघि गम्भीर खालका अन्य कुनै स्वास्थ्य समस्या नरहेको परिवारले बताएको छ ।
स्वर्गीय थापा गुल्मी जिल्ला समाज यूकेमा आजीवन सदस्य थिइन्। उनको निधनमा समाजका तर्फबाट अध्यक्ष टोप पल्लीले दुख व्यक्त गरेका छन् ।