अमेरिका निवासी प्रविण राजथलाको शब्द, संगीत र स्वरमा ‘कान्छीको सम्झनामा’
प्रकाशित मिति : फाल्गुन १, २०७७ शनिबार
हाल अमेरिका निवासी गायक प्रविण राजथलाको शब्द, संगीत र स्वरमा भ्यालेन्टाइन्स डेको अवशरमा प्रेमगीत भिडियोसहित सार्वजनिक भएको छ । कान्छीको सम्झनामा बोलको उक्त गीतको एरेन्ज, मास्टरिङ र मिक्सिङ जोयस गुरुङले गरेका हुन् भने सारङ्गीमा चर्चित नेपाली कलाकार श्याम नेपालीले साथ दिएका छन् ।
बाला रेकर्ड बोस्टनमा रेकर्ड गरियो यो गीतको भिडियो भने अमेरिका र नेपालका विभिनन स्थानमा छायांकन गरिएको छ । बाल्यकाल देखि नै गायन र सङ्गीतमा रुचि राख्ने नेपालको भक्तपुरमा जन्मिएका प्रविणले विद्यालय र कलेजमा पनि आफ्नो प्रस्तुति राख्दै आएका थिए भने विगत १० वर्ष देखि निरन्तर संगीत क्षेत्रमा छन् । उनले युट्युबमा कैयन कभर गीतहरु गाउँदै आएका छन् ।
केही समय बेलायत हुँदै हाल अमेरिकामा रहेका उनको यो पहिलो प्रयास हो । यो गीत नेपाली कान्छीलाई सम्झने धेरै युवाहरूमा समर्पित रहेको उनले बताएका छन् ।
गीतमा नेपाली युवा विदेशबाट नेपाल आएपछि एउटी युवतीसँग माया बसेको विषयलाई प्रस्तुत गरिएको छ । गीतमा आफ्नो गाउँकी कान्छीसँग बिताएका मिठा पलहरू थाँती राखेर सपनाहरू पुरा गर्न बिदेसिनु पर्ने सन्दर्भलाई प्रस्तुत गरिएको छ ।
भिडियोमा एलिस राई र गीता ढुंगानाले अभिनय गरेका छन् । भूपेन्द्र तुम्बाहाम्फेले खिचेको उक्त भिडियोको निर्देशन सत्यराज चौलागाई र सहनिर्देशन साजन कट्टेलले गरेका हुन् । भिडियोको प्रोड्युसर एलिजा महर्जन हुन् ।