टेक्सासमा आप्रवासीलाई अप्ठ्यारो पार्ने नयाँ कानुन सेप्टेम्बर १ देखि
टेक्सासमा अब अन्य राज्यको तुलनामा कागजपत्रविहिन आप्रवासीहरुलाई अप्ठ्यारो हुने भएको छ भने कागजपत्र भएकाहरुसमेत अपमानित हुने सम्भावना रहेको छ । किनभने आगामी सेप्टेम्बर १ देखि लागु हुने गरी टेक्सासमा नयाँ कानुन लागु हुने भएको छ ।
एसबी फोर नामको नयाँ कानुन कार्यान्वन हुन थालेपछि टेक्सासमा प्रहरीले कागजपत्र नभएको आशंका लागेमा कुनै पनि व्यक्तिलाई कुनै पनि स्थानमा रोकेर सोधपुछ र अपमानित गर्न सक्नेछ । यसबाट कागजपत्रविहिनमात्र होइन, कागजपत्र हुनेहरु समेत अपमानित हुनसक्ने सम्भावना बढेको छ ।
कागजपत्रविहिन रहेको आंशका लागेमा रोकेर कागजपत्र माग्न सक्ने अधिकार प्रहरीलाई दिने यो कानुनको कार्यान्वयनले व्यक्तिको संवैधानिक अधिकारको हनन हुनसक्ने भन्दै अधिकारवादीहरुले चासो व्यक्त गरेका छन् । कुनै पनि व्यक्ति उसको बोलीचाली, लवाइखवाई र रंगका कारण विदेशी जस्तो देखिएको आधारमा पनि प्रहरीले रोकेर सोधपुछ गर्न सक्नेछ । जसका कारण कागजपत्र भएकै आप्रवासीहरुले पनि लावाई खवाई, बोलीचाली वा रंगको आधारमा विभेदको अनुभव गर्नसक्ने सम्भावना छ ।
अमेरिकी नागरिकता लिइसकेका वा ग्रिनकार्ड प्राप्त गरिसकेकाहरु समेत अँग्रेजीबाहेक अरु भाषा बोलेमा वा विदेशीको जस्तो पहिरन गरेको खण्डमा समेत प्रहरीले कागजपत्रविहिन भएको आशंकामा अवरोध सृजना गर्न सक्ने भएकाले यो कानुनको विरोध गरिएको हो ।
