एमपीपी अन्तरगत सिमाक्षेत्रबाट फर्काइएका २५ हजारलाई शुक्रबारदेखि प्रकृयामा लगिने
प्रकाशित मिति : माघ ३०, २०७७ शुक्रबार
अदालती प्रकृयासम्मका लागि मेक्सिकोमा नै फिर्ता पठाइएका आप्रवासीहरुलाई सम्बोधन गर्न बाइडेन प्रशासनले प्रकृया सुरु गरेको जनाएको छ । ट्रम्पले ल्याएको माइग्रेन्ट प्रोटेक्सन प्रोटोकल एमपीपी अन्तरगत सिमाक्षेत्रमा आएर एसाइलम गर्नेलाई अदालती प्रकृयासम्म प्रतिक्षा गर्नका लागि मेक्सिकोमा नै पठाइएको थियो ।
अब उनीहरुलाई प्रकृयामा लैजानका लागि डिपार्टमेन्ट अफ होमल्याण्ड सेक्युरिटीले फेबु्रअरी १९ बाट पहिलो चरणको कार्यक्रम सुरु गर्ने भएको छ । जस अन्तरगत सुरक्षित र प्रकृयागत ढंगले उनीहरुको आवेदन अगाडि बढाइने भएको छ । एमपीपी कार्यक्रम अन्तरगत दर्ता भएर मेक्सिको पठाइएकाहरु झण्डै २५ हजार रहेका छन् ।
अहिलेका लागि उनीहरुलाई कुनै कदम नचाल्न र उनीहरु जहाँ छन् त्यही सुरक्षित तरिकाले बस्न सुझाव दिइएको छ । प्रकृयामा लैजानका लागि सुरुमा अनलाइनमार्फत भर्न सकिने भर्चुअल फर्मको व्यवस्था गरिने भएको छ । उक्त फर्ममार्फत कुनै पनि स्थानबाट आफूलाई दर्ता गराउन सकिनेछ । दर्ता गराइसकेपछि योग्य व्यक्तिलाई कहाँ र कसरी उपस्थीत हुने भन्ने सन्दर्भमा थप सुचनाहरु उपलब्ध गराइनेछ ।
कहाँ र कसरी उपस्थीत हुने भन्ने औपचारिक जानकारी नदिंदासम्म सिमाक्षेत्रतिर अगाडि नबढ्न सुझाव दिइएको छ । राष्ट्रपतिले प्रतिज्ञा जनाएअनुशार सरकार सुरक्षित, व्यवस्थीत र मानवीय अध्यागमन प्रणालीको विकाश गर्न कटिबद्ध रहेको र पछिल्लो कदम अध्यागमन प्रणालीमा सुधार अन्तरगतको रहेको डिपार्टमेन्ट अफ होमल्याण्ड सेक्युरिटीका सेक्रेटरी अलेहान्द्रो मेयरकासले जनाएका छन् ।
योग्य व्यक्तिलाई उनीहरुको मुद्दा अमेरिकामा नै सुरक्षित तरिकाले अगाडि बढाउन दिनका लागि अमेरिकी सरकारले अन्तर्राष्ट्रिय सरकारहरु र गैरसरकारी संस्थाहरुसँग सहकार्य गर्ने उनले बताएका छन् । यो नयाँ प्रकृया सिमाक्षेत्रमा आएर एसाइलम दावी गरेका र उनीहरुको मुद्दा अदालतमा रहेको अवस्थामा अदालती सुनुवाईसम्म प्रतिक्षाका लागि मेक्सिको फिर्ता पठाइएकाहरुको सन्दर्भमा मात्र लागु हुनेछ ।
एमपीपी कार्यक्रम अन्तरगत मेक्सिको फिर्ता नपठाइएका, अमेरिकी अध्यागमन अदालतमा मुद्दा नरहेका र अमेरिकाबाहिर रहेकाहरुका सन्दर्भमा यो प्रकृया लागु हुनेछैन । उनीहरुले भने थप जानकारीका लागि प्रतिक्षा गर्नुपर्ने जनाइएको छ । एमपीपी अन्तरगत नयाँ व्यक्तिलाई दर्ता गर्ने काम अमेरिकी सरकारले रोकिसकेको छ । एमपीपी अन्तरगत दर्ता भएका र अमेरिकामा आइसकेकाहरुका सन्दर्भमा पनि आगामी दिनमा फरक निर्देशिका जारी गरिने भएको छ ।
यो घोषणालाई अमेरिकाको सिमाक्षेत्रबाट अनियमित रुपमा व्यक्ति प्रवेशका लागि खुला गरिएको भन्ने गलत ढंगले अर्थ नलगाउन समेत सुझाव दिइएको छ । योग्य व्यक्तिलाई तोकिएको मिति र स्थानबाटमात्र प्रवेशको अनुमति दिइने जनाइएको छ । एमपीपी अन्तरगत दर्ता भएकाहरुले कसरी अनलाइनमार्फत यो प्रकृया अगाडि बढाउने भन्ने सन्दर्भमा अमेरिकी सरकारले थप जानकारीहरु सार्वजनिक गर्ने भएको छ ।