रामकुमारी झाँक्री पक्राउ
प्रकाशित मिति : माघ २९, २०७७ बिहीबार
नेकपा प्रचण्ड–नेपाल पक्षकी नेतृ रामकुमारी झाँक्री पक्राउ परेकी छन् । प्रहरीले झाँक्रीलाई बिहीबार उनकै निवासबाट पक्राउ गरेको हो । प्रहरीले उनलाई राज्यविरुद्धको कसूरमा अनुसन्धान गर्न पक्राउ गर्नुपरेको पुर्जी थमाएको छ ।
राष्ट्रपति विद्यादेवी भण्डारीमाथि झाँक्रीले केहीदिनअघि विवादास्पद अभिव्यक्ति दिएको भन्दै प्रहरीले आज बोलाएको थियो । तर, झाँक्रीले अहिले प्रहरीकोमा नजाने बताउँदै आफूलाई पक्राउ गर्न पूर्जी ल्याउन चुनौती दिएकी थिइन् ।
झाँक्रीलाई पक्राउ गर्न प्रहरी पुगेलगत्तै प्रचण्ड-नेपाल पक्षका कार्यकर्ताहरु त्यसको विरोधमा नाराबाजी गरेका थिए ।
झाँक्रीले केहीदिन अघि गोरखामा आयोजित एक कार्यक्रममा राष्ट्रपति विद्यादेवी भण्डारीमाथि विवादास्पद टिप्पणी गरेकी थिइन् । ‘राष्ट्रपतिका कुरा त के गर्नु र ? बडामहारानीले चुनाव हुन्छ भन्नुभएछ। बडामहारानीलाई गोरखाबाटै सन्देश दिन्छु। शीतल निवासको कारगेट छाडेर कोटेश्वर फर्किए हुन्छ । चाबहिल हो कि कता घर छ रे !’ उनले भनेकी थिइन्, ‘त्यता पनि नभए बालकोट नै गए पनि हुन्छ ।’