४० वर्षमुनिका महिलालाई एक्लै विदेश जान रोक्ने अध्यागमन विभागको प्रस्तावको विरोध
प्रकाशित मिति : माघ २८, २०७७ बुधबार
अध्यागमन विभागले ४० वर्षमुनिका महिलालाई एक्लै विदेश जान रोक्ने कार्यविधि संशोधन प्रस्ताव ल्याएपछि त्यसको विरोध गरिएको छ । एक्लै विदेश भ्रमणमा जाने महिलाहरूका लागि विभेदकारी प्रावधान राखेर कार्यविधि संशोधन अगाडि बढाइएकोमा त्यसले समानताको हकलाई कुण्ठित गरेको भन्दै विरोध भएको हो ।
कानून व्यवशायी शीतल पाण्डे भन्छिन् -‘चालिस बर्ष मुनिका महिलाले विदेश यात्रा तय गर्दा पुरुषको अनुमति माग्नु पर्ने नियमले संविधान प्रदत्त समानताको हकलाई कुण्ठीत गर्छ । यस्तो कुराले महिलाको सुरक्षाको प्रत्याभुत गर्ने नभई महिलाको अधिकार र अस्तित्व पुरुषका वरिपरी घुम्ने गरी सीमितता तर्फ डोर्याउँछ ।’
सामाजिक सञ्जालमा यस्तो प्रस्तावको चर्को विरोध भएको छ ।
अध्यामगन विभागले अध्यागमन कार्यविधि २०६५ को भिजिट भिसासम्बन्धी व्यवस्थालाई संशोधन गर्ने प्रस्ताव गृह मन्त्रालयमा पठाएको हो। नयाँ कार्यविधिअनुसार ४० वर्षमुनिका महिलाहरू एक्लै विदेश जाँदा अब वडा कार्यालयको र पारिवारिक सहमति अनिवार्य चाहिने भएको छ।
मानव तस्करी, शोषण, उद्धार गर्न नसकेको वा अन्य कारणले महिला बिजोगमा परेको कारण देखाइ ४० वर्षमुनीका महिला विदेश जाँदा परिवारको सहमति र वडाको सिफारिस अनिवार्य गर्ने अध्यागमन विभागको संशोधन प्रस्ताव मलाई चैं पटक्कै पचेन। कैलेसम्म महिलाले कुनै पुरुष वा अन्यको हात समाएर हिड्न पर्ने हो?
— Namrata Dhungana (@Wakil_Sahiba) February 10, 2021
मानव तस्करी बढेको, शोषणमा परेको, समस्यामा भए उद्धार गर्न नसकिएको, औषधी उपचार नपाएर बिजोग भएको अवस्थालाई मध्यनजर गर्दै कार्यविधि संशोधन प्रस्ताव गरिएको विभागको तर्क छ । गृहको कानुन शाखामा आवश्यक छलफल भई कार्यविधि चाँडै लागू गर्ने तयारी भइरहेको छ ।
के हुँदै छ देशमा ??40 बर्ष भन्दा मुनिका महिला बिदेश भमणमा जादा ४० वर्षमुनिका महिला विदेश भ्रमणमा जाँदा परिवारको सहमति, वडाको सिफारिस अनिवार्य रे ?? हामी महिलाहरुको आफ्नो अधिकार सधैं अरुले नै निर्धारण गरिदिने हो ?
— ममिता भण्डारी (@BhandariMisti) February 10, 2021
कार्यविधि अनुसार ४० वर्षमुनिका महिला एक्लै भ्रमणमा जाँदा वडा कार्यालय र परिवारको सहमति लिएर मात्र जानु पर्ने छ। कतिपय महिलाहरू परिवारको सहमतिबेगर पनि हिँड्ने गरेकाले त्यसलाई कडाइ गर्न पारिवारिक सहमति खोजिएको जनाइएको छ । विदेश जाने महिलाका लागि पन्ध्र लाखसम्मको निर्जीवन दुर्घटना बिमा अनिवार्य बनाउनुपर्ने विषय पनि समेटिएको छ।
अध्यागमन कार्यविधि २०६५ को भिजिट भिसासम्बन्धी व्यवस्थामा ४० वर्षमुनिका महिलाहरू एक्लै विदेश जाँदा परिवारको र वडाको सिफारिस आवश्यक पर्ने भन्ने प्रावधान राख्ने कुरा उचित छैन। महिला सुरक्षाको नाममा यस्ता प्रतिगामी कदमको अौचित्य पुष्टी हुनै सक्दैन। यसलाई अविलम्ब रोकियोस्।
— pokharel Deepika (@pokharelDeepik1) February 10, 2021
४० वर्षमुनिका महिला परिवारका सदस्य वा श्रीमानसँग भ्रमणमा जाँदा भने पालिकाको सिफारिस र बिमा अनिवार्य नगरिने कार्यविधि संसोधन प्रस्तावमा उल्लेख छ ।