अमेरिकी सिमाक्षेत्रमा आएर एसाइलम खोज्नेलाई तेश्रो देश पठाउने सम्झौता स्थगित
प्रकाशित मिति : माघ २४, २०७७ शनिबार
अमेरिकाले आफ्नो सिमाक्षेत्रमा आएर एसाइलम खोज्नेलाई तेश्रो देश पठाउने एल साल्भाडोर, ग्वाटेमाला र होण्डुरससँगको सम्झौता स्थगित गरेको छ । साथै एल साल्भाडोर, ग्वाटेमाला र होण्डुरससँगको सम्झौताका पूर्णरुपमा नै खारेज गर्नका लागि प्रकृयाको समेत सुरुवात गरेको छ ।
ट्रम्प प्रशासनले अमेरिकी सिमाक्षेत्रमा आएर एसाइलम दावी गर्नेहरुलाई ग्वाटेमाला, होण्डुरस, एल साल्भाडोरमा पठाउनका लागि सम्झौता गरेको थियो । जस अनुशार अमेरिकी सिमाक्षेत्रमा आएर एसाइलम खोज्नेलाई सुरक्षीत तेश्रो देश सहमति अनुरुप ग्वाटेमाला पठाउने नीतिको कार्यान्वयन गतबर्षदेखि नै सुरु भइसकेको थियो । यद्यपी एल साल्भाडोर र होण्डुरससँगको सहमति भने कार्यान्वयनमा आइसकेको थिएन ।
अमेरिकाले सिमाक्षेत्रमा आएर विना भिसा अमेरिकामा एसाइलम खोज्ने अन्य देशका नागरिकलाई ग्वाटेमाला पठाउन सुरु गरेकोमा कोरोनाको महामारीका कारण मध्यमार्चबाट भने त्यहाँ पठाउने क्रम स्थगित भएको थियो । गतबर्षको मार्च अगाडि भने एल साल्भाडोर, होण्डुरस लगायतका मुलुकका कैयन नागरिकलाई ग्वाटेमाला पठाइसकिएको थियो ।
सुरक्षित तेश्रो मुलुक सहमति अनुरुप अमेरिकामा विनाभिसा आएर एसाइलम गर्नेको एसाइलम दावी उचित लागेको खण्डमा उनीहरुलाई थप प्रकृयाका लागि तश्रो मुलुक पठाइने र उक्त मुलुकमा नै एसाइलम दिइनेगरी अमेरिकी एसाइलम नीतिमा ट्रम्प प्रशासनले ठूलो परिवर्तन ल्याएको थियो । ती देशहरुसँग भएको सहमति अनुरुप अमेरिकामा एसाइलम खोज्ने र एसाइलम उचित जस्तो लागेकालाई ती तीनमध्ये कुनै पनि देशमा पठाउन सकिने प्रावधान थियो ।
यो सहमति अनुशार अन्य देशका एकहजार भन्दा धेरैलाई अमेरिकाले ग्वाटेमाला पठाएको थियो । उनीहरुलाई अमेरिकामा एसाइलम आवेदन दिने अवशर नै नदिइकनै ग्वाटेमाला पठाइएको थियो । अमेरिकी सिमाक्षेत्रमा केहीदिनसम्म हिराशतमा राखेर ग्वाटेमाला फिर्ता पठाइएपनि त्यहाँ उनीहरुलाई उपयुक्त शरण प्रदान नगरिएका खबरहरु आएका थिए ।
अमेरिकी विदेशमन्त्री एन्टोनी ब्लींकेनले ती देशहरुसँगको सहमति स्थगनको अर्थ सिमा खुला गरिएको भने नरहेको स्पष्ट पारेका छन् । सिमाक्षेत्रमा आएर एसाइलम दावी गर्नेहरुलाई सुरक्षित र व्यवस्थीत तरिकाले प्रकृयामा लैजाने उनले बताएका छन् । तर जसले अनियमित रुपमा अमेरिका छिर्न खोज्छन्, उनीहरुलाई आफू र आफ्नो परिवारलाई समेत जोखिममा राख्ने ब्लींकेनले बताएका छन् ।