बाइडेन बिलका १२ प्रावधान : कागजपत्रविहिनलाई ग्रिनकार्ड, डिभीको संख्या बृद्धि, एसाइलम डेडलाइन समाप्ती

प्रकाशित मिति : माघ ८, २०७७ बिहीबार

❒  बिल पारित भएमा सन् २०२१ को जनवरी १ भन्दा अगाडि अमेरिकामा रहेका कागजपत्रविहिनले अस्थायी स्टाटसका लागि आवेदन दिन पाउने, टीपीएस, डाका लगायतले समेटेकाहरु भने तत्कालै ग्रिनकार्ड आवेदन दिन योग्य

❒  परिवारमा आधारित स्वीकृत आवेदनका सन्दर्भमा आवेदन स्वीकृत भएकाहरु अस्थायी रुपमा अमेरिकामा आएर ग्रिनकार्डको प्रतिक्षा गर्नसक्ने प्रावधान

❒  डाइभर्सिटी भिसाको नम्बर अहिले बार्षिक ५५ हजार रहेकोमा यो बिलले ८० हजार बनाउने

❒  विज्ञान, प्रविधि, इन्जिनियरिंग र गणितमा अमेरिकी विश्वविद्यालयबाट डिग्री लिएकाहरुलाई अमेरिकामा बस्ने सहज अवस्था बनाउने

❒  अध्यागमन अदालतहरुमा रहेको ब्याकलग घटाउने, योग्य व्यक्तिलाई अध्यागमन राहतहरु दिनका लागि र मुद्दाहरु हेर्नका लागि अध्यागमन न्यायाधिसहरुको तजविज अधिकार बढाउने

❒  एसाइलम खोज्नेहरुका लागि एकबर्षको डेडलाइन हटाउने, एसाइलम आवेदनको ब्याकलग हटाउन रकम उपलब्ध गराउने,  यु भिसाको कोटा १० हजारबाट बढाएर ३० हजार बनाउने

❒ खसोखासमा थप समाचारहरुका लागि यहाँ क्लीक गर्नुहोला ।

 

 

– किशोर पन्थी

अमेरिकी राष्ट्रपति जो बाइडेन समर्थित बिल अमेरिकी नागरिकता ऐन २०२१ मा मुख्य १२ वटा विषयहरु समावेश गरिएका छन् । जनवरी १, २०२१ भन्दा अगाडि अमेरिकामा रहेका कागजपत्रपविहिनलाई नागरिकताको बाटोमा लैजानेदेखि परिवारमा आधारित आवेदन स्वीकृत भएकाहरुलाई अमेरिकामा आएर परिवारसँगै बसेर ग्रिनकार्ड प्रतिक्षा गर्नसक्ने प्रावधान समेत बिलमा समावेश गरिएको छ ।

कागजपत्रविहिनलाई ग्रिनकार्ड

बिल पारित भएमा सन् २०२१ को जनवरी १ भन्दा अगाडि अमेरिकामा रहेका कागजपत्रविहिनले अस्थायी स्टाटसका लागि आवेदन दिन पाउनेछन् । उनीहरु ५ बर्ष अस्थायी स्टाटसमा बसेपछि ग्रिनकार्ड प्राप्त गर्न सक्नेछन् ।

तर उनीहरुले ट्याक्स फाइल गरेको हुनुपर्ने र पृष्ठभूमि परीक्षणमा उत्तिर्ण भएको हुनुपर्नेछ । अपराधको पृष्ठभूमि भएकाहरु अयोग्य हुनसक्नेछन् ।

टीपीएस, डाका लगायतले समेटेकाहरु भने तत्कालै ग्रिनकार्ड आवेदन दिन योग्य हुनेछन् । तीनबर्ष ग्रिनकार्डमा बसेपछि उनीहरुले अमेरिकी नागरिकताका लागि आवेदन दिन सक्नेछन् ।

डिपार्टमेन्ट अफ होमल्याण्ड सेक्युरिटीले सन् २०१७ को जनवरी २० पछि देशनिकाला भएकाहरुलाई भने विशेष सुविधा दिन सक्नेछन् । यदि उनीहरु देशनिकाला हुनुअगाडि ३ बर्ष लगातार अमेरिकामा बसेका थिए भने उनीहरुले परिवारसँगको पुनर्मिलन र अन्य मानवीय आधारमा सुविधा प्राप्त गर्नसक्नेछन् ।

बिलमा एलियन शब्दलाई परिवर्तन गरेर गैरनागरिक बनाउने विषय समेत समेटिएको छ ।

परिवारको मिलन

बिलले ब्याकलग हटाएर परिवारमा आधारित अध्यागमन प्रणालीको पनि सुधार गर्छ । प्रयोग नभएका भिसाहरुको उचित वितरण गर्नुका साथै लामो प्रतिक्षा अवधि हटाएर हरेक देशका लागि तोकिएको भिसाको नम्बर पनि बढाउनेछ । परिवारका लागि अमेरिका आउनमा ३ बर्ष र १० बर्षको बार पनि खारेज गर्छ ।

टुहुरा, विधवा, बालबालिका र फिलिपिनो युद्धका भेट्रानहरुका लागि पनि संरक्षण प्रदान गर्छ । साथै परिवारमा आधारित स्वीकृत आवेदनका सन्दर्भमा आवेदन स्वीकृत भएकाहरु अस्थायी रुपमा अमेरिकामा आएर ग्रिनकार्डको प्रतिक्षा गर्नसक्ने प्रावधान स्थापना गर्छ ।

डाइभर्सिटी भिसाको संख्या बढाउने

बिलले धर्मको आधारमा हुने विभेदलाई निषेध गर्छ । साथै भविश्यमा प्रतिबन्ध लगाउनका लागि राष्ट्रपतिको अधिकारलाई कटौती गर्छ । डाइभर्सिटी भिसाको नम्बर अहिले बार्षिक ५५ हजार रहेकोमा यो बिलले ८० हजार बनाउनेछ ।

एकीकरण र समावेशीकरण

बिलले राज्य र स्थानीय सरकार, निजी संस्थाहरु, शैक्षिक संस्थाहरु, समुदायमा आधारित संस्थाहरु, गैर नाफामुलक संस्थाहरुलाई एकीकरण र समावेशीकरणलाई बढावा दिने, कार्यक्रम थप्नका लागि रकम प्रदान गर्छ । आप्रवासी र शरणार्थी एकीकरण र नागरिकताको प्रवद्र्धन कार्यक्रममा जोड दिनेछ ।

अर्थतन्त्रको विकाश

बिलले रोजगारमा आधारित भिसाको ब्याकलग पनि खारेज गर्नेछ । लामो प्रतिक्षा अवधि र हरेक देशका लागि तय गरिएको भिसाको कोटा खारेज गर्नेछ । बिलले विज्ञान, प्रविधि, इन्जिनियरिंग र गणितमा अमेरिकी विश्वविद्यालयबाट डिग्री लिएकाहरुलाई अमेरिकामा बस्ने सहज अवस्था बनाउनेछ । कम आम्दानी भएको क्षेत्रका कामदारलाई ग्रिनकार्डमा पहुच सहज बनाउनेछ भने रोजगारमा आधारित ग्रिनकार्डका अन्य अनावश्यक बाधाहरु हटाउनेछ ।

कामदार भिसा एचवान बीका डिपेन्डेन्टहरुलाई वर्क परिमट प्रदान गर्ने, बालबालिकाहरुलाई एज आउट हुनबाट संरक्षण प्रदान गर्नेछ ।

कामदारलाई शोषणबाट संरक्षण

कामदारको भेरिफिकेशन प्रणालीमा सुधार गर्नेछ । श्रम शोषण हुनबाट संरक्षण प्रदान गर्नेछ । गम्भीर प्रकारको श्रम शोषणमा परेका कामदारहरुई यु भिसाको संरक्षण प्रदान गर्नेछ । सिजनल कामदारका सन्दर्भमा पनि संरक्षण प्रदान गर्नेछ ।

सिमा सुरक्षा

सिमा सुरक्षाका लागि प्रविधिको विकाशमा जोड दिनेछ । लागुऔषधको ओसारपसार रोक्न सबै प्रकारका नाकाहरुमा प्रविधिको जडान गर्नेछ । अमेरिका छिर्ने हरेक गाडी, व्यक्ति र सामाग्रीको उच्च प्रविधिबाट स्क्रीनिंग गर्नेछ । सिमाक्षेत्रमा एसाइलम खोज्नेहरुलाई प्रकृयामा लैजानेदेखि लागुऔषध लगायतका अनाधिकृत बस्तुको ओसारपसार हुन नदिन विशेष संरचना बनाउनेछ ।

सिमाको व्यवस्थापन

बिलले सिमाक्षेत्रमा खट्ने एजेन्ट र अधिकारीहरुलाई पेशागत मर्यादा कायम गर्न र सुरक्षाका सन्दर्भमा तालिम र शैक्षिक सामाग्रीहरु उपलब्ध गराउनेछ । आपराधिक र प्रशासनिक दुब्र्यबहार रोक्न संयन्त्र बनाउनेछ । सीबीपीको हिराशतमा बालबालिका, परिवार र अन्य व्यक्तिको हेरचाह र स्वास्थ्यका लागि अतिरिक्त रकम उपलब्ध गराउनेछ ।

आपराधिक संगठनमाथि कारवाही

आप्रवासीको शोषण गर्ने मानव तस्करी र लागु औषध तस्करीमा संलग्नहरुलाई कारवाही गर्ने क्षमताको बृद्धि गर्नेछ । विदेशी मानवतस्करीको सञ्जालबिरुद्ध अनुसन्धान अगाडि बढाउनेछ ।

आप्रवासनको कारण हटाउन मद्दत

बिलले एल साल्भाडोर, ग्वाटेमाला, होण्डुरस लगायतका देशलाई सहायता रकम बढाउनेदेखि ती क्षेत्रबाट मान्छेहरु बिस्थापित हुन नदिने कार्यक्रमका लागि सहयोग गर्नेछ । त्यसका लागि ४ बिलियन डलर उपलब्ध गराइनेछ । भ्रष्टाचार, हिंशा र गरिबीका कारण मान्छेहरु घर छाड्न बाध्य भएको अवस्थामा त्यसलाई सम्बोधन गर्ने कार्यक्रम ल्याउनेछ । उनीहरुलाई संरक्षण प्रदान गर्नका लागि मध्य अमेरिकाभर प्रोसेसिंग केन्द्रहरु बनाएर विस्थापितहरुको नाम दर्ता गर्ने र शरणार्थीको प्रकृयामा लगिनेछ । विस्थापितहरुलाई अमेरिका वा अन्य कुनै साझेदारी मुलुकमा स्थापनाका लागि अगाडि बढाइनेछ ।

बिलले अमेरिकामा रहेका आफन्तहरुसँग मिलाउन मध्य अमेरिकी बालबालिका कार्यक्रमलाई पुन संस्थागत गर्नेछ । परिवारमा आधारित भिसा आवेदन स्वीकृत गर्न र परिवारलाई छिटो मिलाउन मध्य अमेरिकी परिवार पुनर्मिलन कार्यक्रम स्थापना गर्नेछ ।

अध्यागमन अदालतमा सुधार

बिलले अध्यागमन अदालतहरुमा रहेको ब्याकलग घटाउनेछ । अध्यागमन अदालतका न्यायाधिसहरुका लागि तालिम बढाउनेछ । अध्यागमन अदालतहरुमा प्रविधि बढाउनेछ । योग्य व्यक्तिलाई अध्यागमन राहतहरु दिनका लागि र मुद्दाहरु हेर्नका लागि अध्यागमन न्यायाधिसहरुको तजविज अधिकार बढाउनेछ ।

एसाइलम खोज्नेहरुलाई सहयोग

बिलले एसाइलम खोज्नेहरुका लागि एकबर्षको डेडलाइन हटाउनेछ । एसाइलम आवेदनको ब्याकलग हटाउन रकम उपलब्ध गराउनेछ । यु र टी भिसाका सन्दर्भमा पनि संरक्षणहरु बढाउनेछ । यु भिसाको कोटा १० हजारबाट बढाएर ३० हजार बनाउनेछ । विदेशमा खटिएका अमेरिकी सेनालाई सहयोग गर्ने विदेशी नागरिकहरुलाई संरक्षण प्रदान गर्ने कार्यक्रम बढाउनेछ ।

 

 

 

KHASOKHAS EDITORIAL TEAM

Editor-in-Chief : Kishor Panthi
Deputy Editor-in-Chief : Ashmita Khadka
Executive Editor : Anil Adhikari
English Editor: Rajan Thapaliya
Editor: Deepak Pariyar
Editor (Business/US Politics) : Suresh Shahi
Multimedia Editor/Presenter : Kiran Marahatta
Europe Editor: Hari Krishna Panthi
Online Editors: Suraj Ghimire, Bikram Khatri, Aashish Khanal, Dikshya Panthi
Chief Photographer: Dipendra Dhungana
Editor (Empowerment) : Sapana Pariyar

KHASOKHAS TEAM

Int. Representative: KP Neupane(Jackson)
Resource Person: Bishwa Bahadur Shah
Goodwill Ambassador: Yam Baral

Contact Us

© 2021 KHASOKAHS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com