अब ग्रिनकार्ड नविकरणको रिसिप्टले म्यादसकिएको १२ महिनासम्म ग्रिनकार्डको काम गर्ने
प्रकाशित मिति : पुस २८, २०७७ मंगलबार
❒ अब नविकरण आवेदन पठाइसकेपछि प्राप्त हुने रिसिप्टले नै ग्रिनकार्डको म्याद सकिएको १२ महिनासम्म अस्थायी ग्रिनकार्डको काम गर्नेछ । तर अमेरिकाबाहिर यात्रा गरेर फर्कदा रिसिप्टका साथमा म्याद सकिएको ग्रिनकार्डपनि बोक्नुपर्नेछ ।
❒ पहिले नै बायोमेट्रिक अप्वाइन्टमेन्ट तय भइसकेका आवेदकका सन्दर्भमा भने पुनरावलोकन गरिएको नयाँ प्रकारको रिसिप्ट प्राप्त नगर्ने जनाइएको छ । उनीहरुले ग्रिनकार्डवाहकका रुपमा अस्थायी प्रमाणको स्टीकर बायोमेट्रिक अप्वाइन्टमेन्टकै बेलामा प्राप्त गर्नेछन् ।
❒ कोरोना महामारीका कारण युएससीआईएसले १३ लाख भन्दा बढी आवेदकलाई बायोमेट्रिक अप्वाइन्टमेन्ट पठाउन नसकेको सन्दर्भमा नयाँ प्रावधान ल्याइएको हो ।
❒ थप समाचारका लागि खसोखासको अध्यागमन अपडेट सेक्सन हेर्नुहोस् ।
जनवरीदेखि ग्रिनकार्ड नविकरणको नयाँ प्रकारको रिसिप्टले म्यादसकिएको १२ महिनासम्म ग्रिनकार्डको काम गर्ने भएको छ । युएससीआइएसले जनवरीदेखि ग्रिनकार्डको नविकरण आवेदनमा नयाँ प्रकारको रिसिप्ट जारी गर्ने जनाएको छ ।
युएससीआईएसले जारी गर्ने नयाँ प्रकारको रिसिप्टले आवेदकको पुरानो ग्रिनकार्डसँगै ग्रिनकार्डको म्याद सकिएको १२ महिनासम्म अमेरिकाको स्थायी बासिन्दाका रुपमा अस्थायी प्रमाणका रुपमा काम गर्ने भएको छ । ग्रिनकार्डको म्याद अगाडि पट्टीको भागमा उल्लेख गरिएको हुन्छ ।
अब ग्रिनकार्डको नविकरण वा पुनस्थार्पनाका लागि आवेदकले आई ९० फर्म भरिसकेपछि युएससीआईएसले आवेदन प्राप्त भएको ७ देखि १० दिनपछि हुलाकमार्फत नयाँ प्रकारको रिसिप्ट नोटिस अर्थात् आई ७९७ पठाउने भएको छ । उक्त रिसिप्ट नोटिस विशेष प्रकारको सुरक्षित कागजमा प्रिन्ट गरेर पठाइने युएससीआईएसले जनाएको छ ।
यही रिसिप्ट नोटिसले ग्रिनकार्डवाहक भएको प्रमाणका रुपमा मात्र काम गर्ने नभई अमेरिकामा काम गर्नका लागि वर्क परमिटका रुपमा समेत काम गर्नेछ । साथै अमेरिकाबाहिर यात्रा गरेर अमेरिका फर्कनका लागि समेत प्रमाणका रुपमा काम गर्नेछ । तर अमेरिकाबाहिरबाट अमेरिका फर्कदा भने यो रिसिप्टका साथमा एक्सपायर भएको ग्रिनकार्ड समेत पेश गर्नुपर्नेछ ।
अबदेखि ग्रिनकार्डको म्याद सकिन लागेका आवेदकहरुले ग्रिनकार्ड नविकरणका लागि आवेदन दिइसकेपछि बायोमेट्रिक अप्वाइन्टमेन्टका बेलामा एप्लीकेशन सपोर्ट सेन्टरबाट भने स्टीकर प्राप्त गर्ने छैनन् । यो स्टीकरले ग्रिनकार्डको म्याद सकिएका ग्रिनकार्डवाहकलाई समेत ग्रिनकार्डवाहक भएको अस्थायी प्रमाणको रुपमा काम गर्दै आएको थियो ।
पहिले नै बायोमेट्रिक अप्वाइन्टमेन्ट तय भइसकेका आवेदकका सन्दर्भमा भने पुनरावलोकन गरिएको नयाँ प्रकारको रिसिप्ट प्राप्त नगर्ने जनाइएको छ । उनीहरुले ग्रिनकार्डवाहकका रुपमा अस्थायी प्रमाणको स्टीकर बायोमेट्रिक अप्वाइन्टमेन्टकै बेलामा प्राप्त गर्नेछन् ।
कोरोना महामारीका कारण युएससीआईएसले १३ लाख भन्दा बढी आवेदकलाई बायोमेट्रिक अप्वाइन्टमेन्ट पठाउन नसकेको सन्दर्भमा नयाँ प्रावधान ल्याइएको हो । नयाँ प्रावधान अनुशार अब आवेदकले म्याद सकिएका ग्रिनकार्डमा यात्रा गर्नका लागि ग्रिनकार्डवाहक भएको अस्थायी प्रमाणका रुपमा दिइने नयाँ स्टीकरका लागि बायोमेट्रिक अप्वाइन्टमेन्ट कुनुपर्ने छैन ।