ट्रम्पका पक्षबाट धाँधलीको दावी सहित दायर ५ मुद्दा पेन्सिलभेनियाको अदालतबाट खारेज


प्रकाशित मिति : कार्तिक २८, २०७७ शुक्रबार

हुलाकमार्फत मतपत्र पठाएर गरिएको मतदानमा धाँधली भएको भन्दै डोनाल्ड ट्रम्प अभियानका तर्फबाट दायर गरिएका ५ वटा मुद्दाहरु पेन्सिलभेनियाको अदालतले अस्वीकार गरेको छ । पेन्सिलभेनियाको फिलाडेल्फियामा अदालतले धाँधलीका आरोपहरु अस्वीकार गरेको हो ।

याचिकाहरुमा ८ हजार ३ सय भन्दा धेरै मतपत्रहरुमा मतदाताहरुको हस्ताक्षरभन्दा तल नाम नलेखेको वा बाहिरी खाममा ठेगाना नलेखेको भन्दै धाँधली भएको आरोप लगाइएको थियो । अदालतले यी हरेक याचिकाहरु अस्वीकार गरेको छ ।

काउन्टीको बोर्ड अफ इलेक्सनको नियम अन्तरगत मतदाताहरुले खाममा नाम लेख्न आवश्यक नरहेको र हस्ताक्षर भन्दा तलपनि नाम लेख्न आवश्यक नभएकाले ट्रम्प अभियानका तर्फबाट दायर गरिएका मुद्दामा दम नभएको अदालतको तर्क छ । ती सबै मतपत्रहरु गणनाका लागि समयमै प्राप्त भएको जनाइएको छ ।

मिसिगन र विसकन्सिनमा ट्रम्प अभियानका तर्फबाट गरिएका धाँधलीका आरोपहरु अस्वीकार गरिएको बेला पेन्सिलभेनियामा पनि ट्रम्प पक्षको कानुनी पराजय भएको हो । डिपार्टमेन्ट अफ होमल्याण्ड सेक्युरिटीकै उच्च समितिका तर्फबाट समेत यो चुनाव अमेरिकी इतिहासमा नै सबैभन्दा सुरक्षित भएको भन्दै संयुक्त बक्तब्य जारी गरिएको थियो ।

गत शनिबार नै अमेरिकी राष्ट्रपतिमा जो बाइडेनलाई निर्वाचित भएको घोषणा गरिएपनि ट्रम्पले अहिलेसम्म पराजय स्वीकार गरेका छैनन् । उनको कानुनी लडाई जारी रहँदा उनको मुद्दाको प्रतिनिधित्व गर्ने केही वकिलहरुले समेत हात झिकिसकेका छन् ।

सबै राज्यबाट आयो परिणाम

अमेरिकी राष्ट्रपति चुनावमा सबै राज्यको नतिजा घोषणा गरिएको छ । १६ इलेक्टोरल कलेज मत रहेको जर्जियामा जो बाइडेनले जीतेका छन् भने डोनाल्ड ट्रम्पले १५ इलेक्टोरल कलेज मत रहेको नर्थ क्यारोलिनामा जीतेका छन् । विगतका राष्ट्रपति चुनावमा एकै रातमा परिणाम आउने भएपनि यसपटक परिणामहरु आउन १० दिन लागेको छ ।

जर्जियामा बाइडेनले झण्डै १४ हजार मतको अन्तरले जितेका हुन् । बाइडेनले २४ लाख ७२ हजार १ सय २ मत प्राप्त गरेका छन् भने ट्रम्पले २४ लाख ५८ हजार १० मत प्राप्त गरेका छन् । मतअन्तर प्रतिशतमा शुन्य दशमलव ३ प्रतिशत रहेको छ ।

नर्थ क्यारोलिनामा ट्रम्पले झण्डै ७५ हजार मतको अन्तरले जीतेका छन् । तर यो जीत उनलाई राष्ट्रपतिमा पुन निर्वाचित हुन प्रयाप्त भने भएन ।

नोभेम्बर ३ मा भएको चुनावपछि नोभेम्बर ७ मा अमेरिकी राष्ट्रपतिमा जो बाइडेनको विजय घोषणा गरिएको थियो । पेन्सिलेभेनिया जितेपछि बाइडेनलाई राष्ट्रपति हुन आवश्यक इलेक्टोलर मत सुरक्षित भएको थियो ।

अब सबै राज्यको घोषणा भइसक्दा बाइडेनका पक्षमा ३०६ इलेक्टोरल कलेज मत सुरक्षित भएको छ भने ट्रम्पका पक्षमा २३२ इलेक्टोरल कलेज मत प्राप्त भएको छ । कुल पपुलर मत मध्ये बाइडेनले ५० दशमलव ८ प्रतिशत र ट्रम्पले ४७ दशमलव ४ प्रतिशत प्राप्त गरेका छन् ।

ट्रम्पले ७ करोड २७ लाख २२ हजार ९ सय १२ मत प्राप्त गरेका छन् भने बाइडेनले ७ करोड ८० लाख ७१ हजार ८७५ मत प्राप्त गरेका छन् । सन् २०१६ को चुनावमा ट्रम्पले जीतेका ५ वटा राज्यमा बाइडेनले जीतेका छन् । विसकन्सिन, मिसिगन, पेन्सिलभेनिया, जर्जिया र एरिजोनामा बाइडेनले जीतेका हुन् ।

सन् १९४८ यता एरिजोना जित्ने बाइडेन दोश्रो डेमोक्र्याट हुन् । त्यतिबेला ह्यारी टर्मयान ले चुनाव जीतेका थिए । त्यसपछि सन् १९९६ मा बिल क्लिन्टनले झिनो मतले एरिजोना जीतेका थिए ।

१६ इलेक्टोरल मत रहेको जर्जियामा राष्ट्रपति चुनावमा सन् १९९६ देखि रिपब्लिकनले जित्दै आएका थिए । सन् २००२ यता जर्जियामा रिपब्लिकन गभर्नरले जित्दै आएका थिए । त्यस्तै जर्जियाबाट सिनेटमा पनि रिपब्लिकनले जित्दै आएका थिए । तर हाउसमा भने मिश्रित प्रतिनिधित्व रहँदै आएको छ ।

 

© 2023 KHASOKHAS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com