अन्तत: बाँकीले पनि गरे एरिजोनामा बाइडेनको जीत घोषणा, १९४८ पछि एरिजोना जित्ने दोश्रो डेमोक्र्याट्स
प्रकाशित मिति : कार्तिक २८, २०७७ शुक्रबार
फक्स न्यूजले राष्ट्रपति उम्मेदबार जो बाइडेनले एरिजोना जितेको घोषणा चुनावकै राती गरेको थियो । तर सीएनएन लगायतका मिडियाले भने अहिलेसम्म घोषणा गरेका थिएनन् । बिहिबार बाँकी मिडियाहरुले पनि एरिजोना बाइडेनले जीतेको घोषणा गरेका छन् ।
एरिजोनामा जीतसँगै बाइडेनले २९० इलेक्टोरल मत सुरक्षित गरेका हुन् । अब जर्जिया र नर्थ क्यारोलिनाको अन्तिम नतिजा आउन बाँकी रहेको छ । अहिलेसम्म डोनाल्ड ट्रम्पले २१७ इलेक्टोरल मत प्राप्त गरेका छन् । जर्जिया र नर्थ क्यारोलिना दुबै जितेपनि ट्रम्पलाई राष्ट्रपति हुन प्रयाप्त इलेक्टोरल मत आउनेछैन ।
सन् १९४८ यता एरिजोना जित्ने बाइडेन दोश्रो डेमोक्र्याट हुन् । त्यतिबेला ह्यारी टर्मयान ले चुनाव जीतेका थिए । त्यसपछि सन् १९९६ मा बिल क्लिन्टनले झिनो मतले एरिजोना जीतेका थिए । एरिजोनामा ११ इलेक्टोरल कलेज मत रहेको छ ।
अघिल्लो चुनावमा ट्रम्पले जीतेका एरिजोनासहित विसकन्सिन, पेन्सिलभेनिया र मिसिगनमा पनि बाइडेनले जीतिसकेका छन् । जर्जियामा पनि झण्डै १५ हजार मतले बाइडेनले नै अग्रता कायम गरिरहेका छन् । नर्थ क्यारोलिनामा भने ट्रम्पको अग्रता कायम रहेको छ ।
अहिलेसम्म ट्रम्पले ७२ मिलियनभन्दा बढी पपुलर मत प्राप्त गरेका छन् । बाइडेनले त्यो भन्दा झण्डै ५ मिलियन बढी ७७ मिलियन पपुलर मत प्राप्त गरेका छन् । ८ वटा ब्याटलग्राउण्ड राज्यमध्ये ५ वटामा बाइडेनले जीतेका छन् भने दुईवटा ट्रम्पले जितेका छन् । जर्जियाको अन्तिम परिणाम आउन बाँकी छ ।
१६ इलेक्टोरल मत रहेको जर्जियामा राष्ट्रपति चुनावमा सन् १९९६ देखि रिपब्लिकनले जित्दै आएका छन् । तर यसपटक जर्जिया ब्याटलग्राउण्ड राज्य भएको छ । सन् २००२ यता जर्जियामा रिपब्लिकन गभर्नरले जित्दै आएका छन् । त्यस्तै जर्जियाबाट सिनेटमा पनि रिपब्लिकनले जित्दै आएका छन् । तर हाउसमा भने मिश्रित प्रतिनिधित्व रहँदै आएको छ ।
नर्थ क्यारोलिनामा नोभेम्बर ३ को पोष्टमार्क भएका र हिजो नोभेम्बर १२ सम्म हुलाकबाट आइपुगेका मतपत्रहरु समेत गणना गरिने भएकाले त्यहाँको अन्तिम परिणाम पनि अब छिट्टै आउने अपेक्षा गरिएको छ ।