बाइडेन राष्ट्रपति भएपछि ११ मिलियन कागजपत्रविहिनलाई अमेरिकी नागरिकताको बाटोमा लगिएला ?


प्रकाशित मिति : कार्तिक २३, २०७७ आईतबार

अमेरिकी राष्ट्रपतिमा जो बाइडेन निर्वाचित भएपछि अमेरिकामा रहेका झण्डै ११ मिलियन कागजपत्रविहिनलाई अमेरिकी नागरिकताको बाटोमा लगिएला ? यो प्रश्न यतिखेर सबैको मनमा उब्जेको छ । तर यसको जवाफ सहज भने छैन ।

डेमोक्र्याट्सहरुले ११ मिलियन आप्रवासीलाई ग्रिनकार्ड हुँदै अमेरिकी नागरिकताको बाटोमा लैजाने पक्षमा लामो समयदेखि वकालत गर्दै आएका छन् । बराक ओबामा राष्ट्रपति र जो बाइडेन उपराष्ट्रपति भएको बेलामा सन् २०१३ मा बृहत अध्यागमन सुधार सहितको यस्तो बिल पारित गराउने असफल प्रयास समेत भएको थियो । तर त्यतीबेला सिनेटमा डेमोक्र्याट्सको बहुमत रहेपनि हाउसमा भने रिपब्लिकनको बहुमत कायम भएकाले बिल पारित हुन सकेन ।

यद्यपी सन् २००९ देखि सन् २०११ सम्म दुबै सदनमा डेमोक्र्याट्सको बहुमत थियो भने राष्ट्रपति बराक ओबामा र उपराष्ट्रपति जो बाइडेन थिए । त्यतीबेला डेमोक्र्याट्सले चाहेका अध्यागमन सुधारका कुनै पनि बिल पारित गराउन सक्ने अवस्था थियो । तर त्यस्ता बिलहरु संसदमा ल्याइएन ।

त्यसपछिको सन् २०११ देखि २०१३ सम्मको संसदमा सिनेटमा डेमोक्र्याट्सको र हाउसमा रिपब्लिकनको बहुमत कायम भयो । त्यतीबेला ११ मिलियन कागजपत्रविहिनलाई ग्रिनकार्डको बाटो हुँदै अमेरिकी नागरिकताको बाटोमा लैजाने बिलले निकै चर्चा पायो । तर राष्ट्रपति ओबामा भएपनि संसदका दुबै सदनमा एउटै पार्टीको बहुमत कायम नभएका कारण यो बिल पारित हुन सकेन ।

२०१३ देखि २०१५ सम्मको संसदमा पनि उही अवस्था कायम रह्यो । अर्थात् हाउसमा रिपब्लिकनको र सिनेटमा डेमोक्र्याट्सको बहुमत कायम भयो । त्यसपछिको २०१५ देखि २०१७ सम्मको संसद रिपब्लिकनको नियन्त्रणमा गयो । अर्थात् दुबै सदनमा रिपब्लिकनको बहुमत कायम भएकाले ओबामा कार्यकालको उत्तरार्धमा डेमोक्र्याट्सले संसदबाट अध्यागमनका सन्दर्भमा केही पारित गराउन सकेनन् ।

यसैबीचमा सन् २०१७ मा राष्ट्रपति डोनाल्ड ट्रम्पले कार्यभार सम्हाले । २०१७ देखि २०१९ सम्म संसदका दुबै सदनमा रिपब्लिकनको बहुमत कायम रह्यो । त्यसपछिको २०१९ देखि अहिलेको संसदमा पुन परिदृश्य बदलियो । अर्थात् सिनेटमा रिपब्लिकनको र हाउसमा डेमोक्र्याट्सको बहुमत कायम भयो ।

यसपटक हाउसमा डेमोक्र्याट्सको बहुमत कायम हुने देखिएको छ । तर सिनेटको परिदृश्य हेर्दा रिपब्लिकनले बहुमत कायम गर्ने सम्भावना बढी रहेको छ । संसदका दुईवटा सदनमा दुईपार्टीको नियन्त्रण कायम रहेको अवस्थामा डेमोक्र्याट्सले दुईदलीय सहमति विना ल्याएका कुनै पनि बिलहरु पारित हुन सहज हुनेछैन ।

ओबामा कार्यकालमा र ट्रम्प कार्यकालमा झण्डै २ बर्ष राष्ट्रपति र संसदमा नियन्त्रण एउटै पार्टीको कायम रह्यो । तर त्यो बेलामा उनीहरुले खासै उल्लेख्य बिलहरु ल्याउन सकेनन् । जब संसदका दुबै सदनमा फरक फरक पार्टीको नियन्त्रण कायम हुन्छ, उनीहरुले आफ्ना एजेण्डाहरु तेज पार्ने गरेका छन् । तर फरकफरक पार्टीको नियन्त्रण कायम भएकाले ती एजेण्डा पारित हुन र कार्यान्वयन हुन सकेका छैनन् ।

डेमोक्र्याट्सले ११ मिलियन कागजपत्रविहिनलाई ग्रिनकार्डको बाटोमा लैजाने गरी प्राथमिकतामा राख्दै आएको बृहत अध्यागमन सुधारको एजेण्डा दुबै सदनमा उनीहरुको नियन्त्रण कायम नभएसम्म पारित हुन सहज छैन । राष्ट्रपति बाइडेन भएकै अवस्थामा दुबै सदनमा उनीहरुको नियन्त्रण कायम भएमा के गर्नेछन् ? त्यो भने हेर्न बाँकी छ । यद्यपी डाका र टीपीएसले समेटेकाहरुलाई तत्काल देशनिकाला हुनबाट जोगाउन भने बाइडेनले कार्यकारी आदेशमार्फत सहजै सक्नेछन् ।

 

 

 

© 2023 KHASOKHAS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com