प्रष्टमत नआएपछि जर्जियामा जनवरी ५ मा विशेष चुनाव हुने
प्रकाशित मिति : कार्तिक २१, २०७७ शुक्रबार
जर्जियामा मतगणना अन्तिम चरणमा रहेको अवस्थामा सिनेटका २ सिटमा कसैले पनि ५० प्रतिशतभन्दा धेरै मत ल्याउन नसकेपछि आगामी जनवरी ५ मा विशेष चुनाव हुने निश्चित भएको छ । सिनेटका रिपब्लिकन उम्मेदबार डेभिड पर्डयु र डेमोक्रेटिक उम्मेदबार जोन ओसोफ दुबैले ५० प्रतिशतभन्दा धेरै मत ल्याउन सकेका छैनन् ।
दुई उम्मेदबारमध्ये रिपब्लिकन उम्मेदबारको अग्रता रहेको छ । तर उनले चुनाव जित्नका लागि आवश्यक स्पष्ट बहुमत ल्याउन सकेका छैनन् । जर्जियामा स्पष्ट बहुमत नल्याएको खण्डमा सबैभन्दा धेरै मत ल्याउने मुख्य दुई उम्मेदबारबीच अर्को चुनाव गराउने प्रावधान रहेको छ ।
जर्जियामा सिनेटको अर्को सिटमा पहिले नै जनवरी ५ मा विशेष निर्वाचत गराउने निश्चित भइसकेको छ । रिपब्लिकन उम्मेदबार केली लोफ्लर र डेमोक्रेटिक उम्मेदबार राफल वार्नकमध्ये कसैले पनि ५० प्रतिशत मत ल्याउन नसकेपछि दुई मुख्य उम्मेदबारबीच जनवरी ५ मा पुन प्रतिस्पर्धा गराइने भएको छ ।
यी दुई उम्मेदबारहरुमध्ये डेमोक्रेटिक उम्मेदबारको अग्रता रहेपनि भोट भने ३३ प्रतिशतभन्दा पनि कम रहेको छ । सिनेटका २ सिटमा मात्र जनवरी ५ मा चुनाव हुनेछ । राष्ट्रपति लगायतका अन्य पदमा भने चुनाव हुनेछैन । यद्यपी २ वटा सिटमा चुनाव हुने भएपछि सिनेटमा रिपब्लिकन वा डेमोक्र्याट्स मध्ये कस्को नियन्त्रण कायम हुनेछ भन्ने थाहा पाउन जनवरीको पहिलोसातासम्म कुनुपर्ने भएको छ ।
अहिलेसम्मको म परिणाम अनुशार सिनेटका एकसयसिटमध्ये ४८ मा डेमोक्र्याट्सको र ४८ मा रिपब्लिकनको नियन्त्रण कायम हुने देखिएको छ । अलास्का र नर्थ क्यारोलिनाको परिणाम आउन बाँकी रहेको छ तर दुबै स्थानमा रिपब्लिकन उम्मेदबारले अग्रता कायम गरेका छन् ।
अलास्का र नर्थ क्यारोलिनामा रिपब्लिकन उम्मेदबारले जीतेको खण्डमा सिनेटमा ४८ सिट डेमोक्र्याट्सको र ५० सिट रिपब्लिकनको हुनेछ । बाँकी २ सिट कस्लो हुने भन्ने कुराको निर्धारण जनवरीको पहिलो सातामात्र हुनेछ ।