संसदका दुबै सदन नजिते बाइडेन राष्ट्रपति भएपनि गतिरोध
प्रकाशित मिति : कार्तिक २०, २०७७ बिहीबार
संसदका दुबै सदनमा बहुमत कायम गर्न नसकेको खण्डमा जो बाइडेनले राष्ट्रपति चुनाव जितेपनि सुरुदेखि नै गतिरोध कायम रहने देखिएको छ । अहिलेसम्मको अवस्था अनुशार सिनेटमा रिपब्लिकनको बहुमत कायम हुने सम्भावना रहेको छ ।
हाउसमा डेमोक्र्याटस्को बहुमत रहेपनि सिनेटमा रिपब्लिकनको बहुमत कायम रहेको खण्डमा डेमोक्र्याट्स समर्थित बिलहरु पारित हुनमा सहज हुनेछैन । डाका र टीपीएसवाहकलाई ग्रिनकार्डको बाटोमा लैजाने बिलहरुदेखि कोरोनाको राहत प्याकेजसम्म पारित हुनमा सहज हुनेछैन ।
बाइडेन राष्ट्रपतिमा निर्वाचित भएमा डोनाल्ड ट्रम्पले जारी गरेका केही कार्यकारी आदेशहरु उल्टाउन सक्नेछन् । र बाइडेनले नयाँ कार्यकारी आदेशहरु जारी गर्न सक्नेछन् । तर ट्रम्पले जारी गरेका आदेशहरु उल्टाउँदा अदालतको बाटोमा गएको खण्डमा सर्बोच्च अदालतमा रिपब्लिकनहरुले नियुक्त गरेका न्यायाधिसहरुको बाहुल्यता रहेको छ ।
सर्वोच्च अदालतका ९ न्यायाधिसमध्ये ६ जना न्यायाधिसहरु रिपब्लिकनले नियुक्त गरेका रुढीवादी न्यायाधिसहरु रहेका छन् भने ३ जना न्यायाधिसहरु डेमोक्र्याट्सले नियुक्त गरेका प्रगतिशिल न्यायाधिसहरु रहेका छन् । कतिपय विषय सर्वोच्च अदालतमा पुग्दा बाइडेन प्रशासनको विपक्षमा निर्णयहरु आउनसक्ने सम्भावना उच्च रहेको छ ।
टीपीएस र डाकामा हुनेहरुले यति बेला बाइडेन राष्ट्रपतिमा निर्वाचित भएमा केही राहत प्राप्त हुने आशा गरेका छन् । तर दुबै सदनमा पकड कायम नभएसम्म उनीहरुलाई ग्रिनकार्डको बाटोमा लैजान सहज छैन । यद्यपी बाइडेनले कार्यकारी आदेशमार्फत तत्कालै देशनिकाला हुनबाट भने बचाउन सक्नेछन् ।
ट्रम्प प्रशासनको पालामा अध्यागमनका क्षेत्रमा गरेका कैयन नीतिगत परिवर्तनहरुलाई पनि बाइडेन राष्ट्रपतिमा निर्वाचित हुँदैमा तत्काल उल्टाउनसक्ने अवस्था नहुने देखिन्छ । युएससीआईएसले कैयन नियमहरुमा प्रकृया पूरा गरेर परिवर्तन गरेको छ । पब्लिक चार्ज लगायतका कैयन नियमहरु अदालतले पनि सदर गरिसकेको छ ।
सिनेटमा रिपब्लिकनको बहुमत कायम भएमा अदालतमा सुधार लगाएका डेमोक्र्याट्सका कैयन एजेण्डा त मृत प्राय नै हुनेछन् । डेमोक्र्याट्सहरु बन्दुक हिंशा, जलवायु परिवर्तन, समलिंगीहरुको अधिकार, मतदानको अधिकार, जातीय विभेद लगायतका कैयन विषयहरुलाई सम्बोधन गर्न इच्छुक देखिएका छन् । तर दुबै सदनमा पकड कायम नगर्दासम्म यी कुनै पनि विषय अगाडि बढाउन सहज हुनेछैन ।