९९ प्रतिशत मतगणना हुँदा पनि जर्जियामा विजेता किन अनिश्चित?
प्रकाशित मिति : कार्तिक २०, २०७७ बिहीबार
९९ प्रतिशत मतगणना हुँदा पनि जर्जियामा को विजेता हुनेछ भन्ने अनुमान गर्न गाह्रो भएको छ । अत्यन्तै कम मार्जिनका कारण र अझै झण्डै ६० हजार मतगणना बाँकी रहेका कारण जर्जियामा कस्ले जित्छ अनुमान गर्न गाह्रो भएको हो ।
यो समाचार तयार पार्दासम्म जो बाइडेनको तुलनामा डोनाल्ड ट्रम्प १५ हजार मतले अगाडि छन् । तर गणना गर्न बाँकी रहेका मतले अन्तिम परिणाम बदल्न सक्ने अझै सम्भावना रहेकाले परिणाम अनुमान गर्न अझै कठिन रहेको छ ।
विगतमा रिपब्लिकनको पकड क्षेत्र रहेको जर्जिया अहिले ब्याटलग्राउण्ड राज्यका रुपमा उदय भएको हो । जर्जियाबाट कुल १६ इलेक्टोरल मत प्राप्त हुन्छ । अहिलेसम्म ट्रम्प शुन्य दशमलव ३ प्रतिशत मतलेमात्र अगाडि रहेका छन् ।
केहीबेर अगाडिसम्मको रिपोर्ट अनुशार ब्रायन काउन्टीमा ३ हजार २७, बु्रक काउन्टीमा ४९४, चाथम काउन्टीमा १७ हजार १ सय ५७, क्लेटन काउन्टीमा ७ हजार ४ सय ८, कब काउन्टीमा झण्डै ७ सय, फ्लोयड काउन्टीमा ६ सय ८२, फोर्सेथ काउन्टीमा ४ हजार ७ सय १३ मत गणना गर्न बाँकी रहेको छ ।
त्यस्तै फुल्टन काउन्टीमा ११ हजार २ सय, ग्वीनेट काउन्टीमा ७ हजार ३ सय, ह्यारिस काउन्टीमा ३ हजार ६ सय ४१, लरेन्स काउन्टीमा १७ सय ९७, पुटनाम काउन्टीमा १५५२, टेलर काउन्टीमा ४५६ मत गणना गर्न बाँकी रहेको छ ।
अहिलेसम्मको परिणाम अनुशार बाइडेनले झण्डै २४ लाख १९ हजार र ट्रम्पले २४ लाख ३४ हजार मत प्राप्त गरिसकेका छन् । जर्जियामा अहिले हुलाकबाट प्राप्त मतपत्रहरु गणना भइरहेको छ ।
झण्डै ११ हजार मतगणना बाँकी रहेको फुल्टन काउन्टीमा बाइडेनका पक्षमा झण्डै ७३ प्रतिशत र झण्डै साढे ७ हजार मतगणना बाँकी रहेको क्लेटन काउन्टीमा बाइडेनका पक्षमा ८५ प्रतिशत मत खसेको अनुमान गरिएको छ ।