अब यी बाँकी ६ राज्यको परिणाम कहिले आउला ? को छ अगाडि ?
प्रकाशित मिति : कार्तिक १९, २०७७ बुधबार
अमेरिकाका वासिंटन डिसी र ४४ राज्यको मतपरिणाम लगभग आइसकेको छ । अब ६ वटा राज्यहरुमात्र बाँकी रहेका छन् । जसमध्ये ४ वटा ब्याटलग्राउण्ड राज्यमा सबैको ध्यान केन्द्रीत रहेको छ ।
डेमोक्र्याट्सको पकड रहेको नेभाडामा नोभेम्बर १० सम्म हुलाकबाट प्राप्त भएका मतपत्रहरु पनि गणना गरिनेछ । तर ती मतपत्रहरु चुनावको दिनसम्म पोष्ट मार्क गरिएको हुनुपर्नेछ । नेभाडाबाट ६ इलेक्टोरल मत प्राप्त हुन्छ ।
त्यस्तै रिपब्लिकनको पकड रहेको अलास्कामा ३ इलेक्टोरल मत रहेको छ । अक्टोबर २९ पछाडि हुलाकबाट मतपत्र पठाएर हालिएका मत र अग्रिम मतदानमा सहभागी भएर हालिएका मतहरु अलास्कामा अर्कोसातामात्र गणना गरिनेछ । त्यसैले अलास्काको पूर्ण मतपरिणाम सार्वजनिक हुन समय लाग्नेछ ।
अहिले सबैको ध्यान मिसिगनमा केन्द्रीत रहेको छ । ९९ प्रतिशत मतगणना भइसकेको मिसिगनमा बाइडेन शुन्य दशमलव ९ प्रतिशत अगाडि रहेका छन् । मिसिगनको अन्तिम मत परिणाम आजै आउने अपेक्षा गरिएको छ ।
त्यस्तै पेन्सिलभेनियामा हुलाकमार्फत प्राप्त मतहरु गणना भइरहेको छ । तर झण्डै ३० लाख मतहरु रहेकाले कहिलेसम्म गणना सकिने भन्नेबारे बताउन मुस्किल छ । यद्यपी आज रातीसम्म मतगणनाको मोटामोटी परिणाम आउने अनुमान गरिएको छ । तर पेन्सिलभेनियामा नोभेम्बर ६ सम्म हुलाकबाट प्राप्त मतपत्रहरु पनि गणना गर्नुपर्नेछ । यद्यपी प्राप्त हुन बाँकी मतपत्रको संख्या कम छ । पेन्सिलभेनियामा अहिलेसम्म ट्रम्प अगाडि छन् । तर गन्नबाँकी झण्डै ३० लाख मतपत्रमा झण्डै २० लाख रजिस्टर्ड डेमोक्र्याट्सहरु रहेका छन् ।
नर्थ क्यारोलिनामा नोभेम्बर १२ सम्म हुलाकबाट प्राप्त मतपत्रहरु गणना गर्नुपर्नेछ । त्यसैले अन्तिम घोषणा त्यतीबेलासम्म नहुने देखिएको छ । अहिले नर्थ क्यरोलिनामा ट्रम्पले अग्रता कायम गरिरहेका छन् ।
जर्जियाको मतगणना आजै समाप्त हुने अपेक्षा गरिएको छ । त्यहाँ ट्रम्पले अग्रता कायम गरिरहेका छन् ।