पेन्सिलभेनियामा शुन्य दशमलव ५ प्रतिशतभन्दा कम मतान्तर भए पुन: मतगणना गरिने
प्रकाशित मिति : कार्तिक १९, २०७७ बुधबार
पेन्सिलभेनियामा पहिलो र दोश्रो हुने राष्ट्रपति उम्मेदबारबीच शुन्य दशमलव ५ प्रतिशतभन्दा कम मतान्तर भए पुन: मतगणना गरिने भएको छ । पेन्सिलभेनियाका सेक्रेटरी अफ स्टेट क्याथी बुकभारका अनुशार पुन: मतगणना सम्भव भएपनि अवस्यंभावी भने नभएको बताएका छन् ।
८० प्रतिशत मतगणनाको नतिजा आउँदासम्म पेन्सिलभेनियामा डोनाल्ड ट्रम्पले ४ लाख ५८ हजार ९ सय १५ मतले लिड गरिरहेका छन् । पेन्सिलभेनियामा शुन्य दशमलव ५ प्रतिशतभन्दा कम मतान्तर भए स्वत: पुन: मतगणना हुने प्रावधान रहेको छ ।
सन् २०१६ को चुनावमा शुन्य दशमलव ७ प्रतिशत मतान्तर भएका कारण पुन: मतगणना गर्नुपरेको थिएन । तर यसपटक के हुन्छ त्यसका लागि भने बेलुकासम्म कुर्नुपर्नेछ ।
उता जो बाइडेनले चुनाव जीतेको विसकन्सिनमा पुन: मतगणना हुनुपर्ने ट्रम्पको अभियानले माग गरेको छ । उनीहरुले विसकन्सिनमा पुन: मतगणनाका लागि आग्रह गर्ने जनाएका छन् । विसकन्सिनमा मतान्तर शुन्य दशमलव २५ प्रतिशतभन्दा कम भएमा स्वत: पुन: मतगणना हुने प्रावधान रहेको छ ।
यसैबीच मिसिगनमा मतगणना रोक्न माग गर्दै अदालतमा मुद्दा दायर गरिएको भन्दै ट्रम्पको अभियानले जनाएको छ । मतपत्र खोल्ने र गणना गर्ने प्रकृयामा अवलोकनका लागि अर्थपूर्ण पहुच कायम नभएसम्म मतगणना रोक्न माग गर्दै मुद्दा दायर गरिएको उनीहरुले जनाएका छन् ।