न्युयोर्कसिटीमा मात्रै ११ लाखले गरे अग्रिम मतदान, अमेरिकाभर झण्डै १० करोड
प्रकाशित मिति : कार्तिक १६, २०७७ आईतबार
न्युयोर्कमा आइतबार अग्रिम मतदानको अन्तिम दिन रहेकोमा न्युयोर्क सिटीमा रहेका अमेरिकनहरु पनि उत्साहजन रुपमा अग्रिम मतदानमा सहभागी भएका छन् । न्युयोर्कमा अक्टोबर २४ देखि अग्रिम मतदान सुरु भएकोमा आइतबार सकिएको हो । सोमबार एकदिन खाली हुनेछ भने मंगलबार चुनावको मुख्य दिन हो ।
अक्टोबर २४ देखि नोभेम्बर १ सम्म न्युयोर्क सिटीमा ११ लाख १९ हजार ५६ जनाले अग्रिम मतदान गरेका छन् । जसमध्ये ब्रोंक्समा १ लाख ५३ हजार ७९ जनाले, ब्रुकलिनमा ३ लाख ७३ हजार २ सय ७० जनाले, क्वीन्समा २ लाख ५० हजार ८३ जनाले, म्यानहटनमा २ लाख ३८ हजार ५ सय ८१ जनाले र स्टेटन आइल्याण्डमा १ लाख ४ हजार ४३ जनाले मतदान गरेका छन् ।
NYC Early Voting 2020 is Complete!!!! Manhattan 238,581
Bronx 153,079
Brooklyn 373,270
Queens 250,083
Staten Island 104,043 Cumulative Check-Ins 1,119,056 Thank you NYC ????— NYCBoardOfElections (@BOENYC) November 1, 2020
अमेरिकाभर झण्डै १० करोडले अग्रिम मतदान गरिसकेका छन् । जसमध्ये सबैभन्दा धेरै क्यालिफोर्निया, टेक्सास र फ्लोरिडामा मतदान भएको छ । क्यालिफोर्नियामा १ करोड बढीले अग्रिम मतदान गरिसकेका छन् भने टेक्सासमा ९७ लाख भन्दा धेरैले अग्रिम मतदान गरिसकेका छन् । ब्याटलग्राउण्ड राज्यका रुपमा रहेको फ्लोरिडामा ८७ लाख भन्दा धेरैले अग्रिम मतदान गरिसकेका छन् ।
वासिंटन पोष्ट र एबीसी न्यूजको पोलमा दुई ब्याटलग्राउण्ड राज्यहरुमध्ये पेन्सिलभेनियामा राष्ट्रपति उम्मेदबार जो बाइडेन र फ्लोरिडामा राष्ट्रपति उम्मेदबार डोनाल्ड ट्रम्प अगाडि देखिएका छन् । यी दुई राज्यहरु अहिले निर्णायक राज्यका रुपमा अगाडि आएका छन् ।
तपाईले आजै भोट हाल्नुपरेमा कस्लाई हाल्नुहुन्छ ? वा भोट हालिसक्नुभएको छ भने कस्लाई हाल्नुभयो ? भन्ने प्रश्नमा सम्भावित मतदाताहरुमध्ये पेन्सिलभेनियामा ५१ प्रतिशत बाइडेनका पक्षमा र ४४ प्रतिशत ट्रम्पका पक्षमा देखिएका छन् ।
सोही प्रश्नमा फ्लोरिडामा ५० प्रतिशत ट्रम्पका पक्षमा र ४८ प्रतिशत बाइडेनका पक्षमा देखिएका छन् । पेन्सिलभेनियामा बाइडेनले जित्ने सम्भावना उच्च रहेपनि फ्लोरिडामा भने तत्काल अनुमान लगाउन निकै मुस्किल रहेको छ । एकमहिना अगाडि पेन्सिलभेनियामा पनि बाइडेनका पक्षमा ५४ प्रतिशत रहेकोमा अहिले ५१ प्रतिशतमा झरेको छ ।
दुईवटा राज्यहरुमा सबैको ध्यान केन्द्रीत भइरहेपनि अन्य ब्याटलग्राउण्ड राज्यहरुको पनि उत्तिकै महत्व छ । कुनै बेला रिपब्लिकनको पकड रहेको जर्जिया अहिले ब्याटलग्राउण्ड राज्य भएको छ भने टेक्सासमा ट्रम्पले जित्ने सम्भावना उच्च रहेपनि प्रतिस्पर्धा भने कम रोचक छैन ।
