चुनावको राती हुलदंगा हुनसक्ने आशंकामा न्युयोर्कका स्टोरमा ठोकियो प्लाइउड
प्रकाशित मिति : कार्तिक १६, २०७७ आईतबार
चुनावको राती हुलदंगा हुनसक्ने आशंकामा न्युयोर्क सिटीका कैयन स्टोरमा प्लाइउड ठोकिएको छ । स्टोरका सिसाका झ्यालहरु तोडफोड हुनसक्ने आंशकामा प्लाइउड ठोकिएको हो ।
न्युयोर्कको हेराल्ड स्क्वायरमा रहेको चर्चित स्टोर मेसिजले स्टोरको सिसालाई ढाक्नेगरी प्लाइउड ठोकेको छ । चुनावको राती तोडफोड र लुटपाट हुनसक्ने सम्भावनालाई मध्यनजर गरेर सुरक्षाका लागि यसो गरिएको जनाइएको छ ।
जर्ज फ्लोयडको मृत्युपछि भएका प्रदर्शनका क्रममा यो स्टोरमा तोडफोड र लुटपाट भएको थियो । यद्यपी चुनावको दिनमा र त्योभन्दा अगाडि पनि यो स्टोर दिउसोमा भने खुल्ला नै रहनेछ ।
Macy’s flagship store in Herald Square boarding up ahead of Election Day … preparing for potential unrest … store will remain open to shoppers #NYC #nbc4ny pic.twitter.com/6Z6rLVhRBJ
— Steven Bognar (@Bogs4NY) October 30, 2020
न्युयोर्कका मेयर बिल ब्लाजिओले शान्तिपूर्ण प्रदर्शन स्वीकार्य हुने तर कुनै हुलदंगा भएका तुरुन्तै रोक लगाइने बताएका छन् । विभिन्न प्रदर्शनहरु र दुई समुहका प्रदर्शनकारीहरुबीच हुनसक्ने झडपलाई मध्यनजर गरेर तयारीहरु गरिएको मेयर ब्लाजिओले बताएका छन् ।
टाइम्स स्क्वायरमा रहेको टि मोबाइलको स्टोरमा पनि प्लाइउड ठोकिएको छ । न्युयोर्कका कैयन स्टोरमा प्लाइउड ठोकिएको छ भने चुनावको दिनसम्म अरु कैयनमा पनि ठोकिने अपेक्षा गरिएको छ ।
न्युयोर्कबाहेक वासिंटन डिसी लगायतका क्षेत्रमा समेत कैयन स्टोरमा प्लाइउड ठोकिएको छ । अमेरिकामा राष्ट्रपति चुनावको मुख्य दिन नोभेम्बर ३ हो ।