KHASOKHAS ON GOOGLE NEWS Fact Checking Stories of Hope Resource Center Donate to Khasokhas KHASOKHAS MAGAZINE Terms of Service/Privacy Policy (English)

ताजा सर्वेक्षणमा ३ ब्याटलग्राउण्ड राज्यमा बाइडेन र एकमा ट्रम्प अगाडि

प्रकाशित मिति : कार्तिक १३, २०७७ बिहीबार

बिहिबार सार्वजनिक नयाँ सर्वेक्षणमा राष्ट्रपति उम्मेदवार जो बाइडेन ३ वटा ब्याटलग्राउण्ड राज्यमा अर्का उम्मेदबार डोनाल्ड ट्रम्पको तुलनामा अगाडि देखिएका छन् । फ्लोरिडा, पेन्सिलभेनिया र ओहायोमा बाइडेन अगाडि देखिएका छन् भने आयोवामा ट्रम्प अगाडि देखिएका छन् ।

फ्लोरिडामा बाइडेनले ४५ प्रतिशत र ट्रम्पले ४२ प्रतिशत समर्थन प्राप्त गरेका छन् । आयोवामा भने ट्रम्पले ४७ प्रतिशत र बाइडेनले ४६ प्रतिशत समर्थन प्राप्त गरेका छन् ।

पेन्सिलभेनियामा बाइडेन अर्का उम्मेदवार ट्रम्प भन्दा ७ प्वाइन्टले अगाडि देखिएका छन् । बाइडेनले ५१ प्रतिशत र ट्रम्पले ४४ प्रतिशत समर्थन प्राप्त गरेका छन् । ओहायोमा बाइडेनले ४८ प्रतिशत र ट्रम्पले ४३ प्रतिशत समर्थन प्राप्त गरेका छन् ।

अमेरिकी राष्ट्रपति चुनावको अन्तिम साता चलिरहँदा विभिन्न खाले सर्वेक्षणहरु सार्वजनिक भइरहेका छन् । यसै क्रममा यो पछिल्लो सर्वेक्षण सार्वजनिक भएको हो । खासगरी फ्लोरिडा, पेन्सिलभेनिया र ओहायो मुख्य ब्याटलग्राउण्ड राज्यका रुपमा चर्चित छन् ।

पछिल्लो सर्वेक्षणको पूर्ण पाठ

फ्लोरिडासँग २९, पेन्सिलभेनियासँग २० र ओहायोसँग १८ इलेक्टोरल मत रहेका छन् । यी राज्यहरुले राष्ट्रपति चुनावमा आफ्नो अभिमत बदल्दै आएका कारण यी राज्यहरुतिर सबैको ध्यान केन्द्रीत भएको हो ।

अमेरिकी चुनावमा मतदान गर्न योग्य अमेरिकीहरुले इलेक्टोरल मतका लागि इलेक्टरहरु छान्नका लागि अमेरिकी इलेक्टोरल कलेजका सदस्यहरुका लागि मतदान गर्दछन् । त्यस्ता इलेक्टरहरुले पहिले नै आफूले कुन उम्मेदवारका लागि मतदान गर्ने भन्ने सार्वजनिक गरिसकेका हुन्छन् । जनताबाट छानिएका इलेक्टरहरुले राष्ट्रपति र उपराष्ट्रपतिका लागि इलेक्टोरल मतदान गर्दछन् । मतदानपछि पूर्ण बहुमतप्राप्त उम्मेदवारलाई विजेता घोषणा गरिन्छ ।

५० वटा राज्य र वासिंटन डिसीबाट जनसंख्याको अनुपातको आधारमा ५३८ इलेक्टोरल मतको तय गरिएको छ । जम्मा ५३८ इलेक्टोरल मतमध्ये विजेता हुनका लागि कम्तीमा २७० मतको आवश्यकता पर्छ ।

यदि राष्ट्रपतिका लागि कसैले पनि पूर्ण बहुमत प्राप्त गर्न नसकेको खण्डमा प्रतिनिधिसभाले राष्ट्रपति छान्ने र उपराष्ट्रपतिका लागि कसैले पनि पूर्ण बहुमत प्राप्त गर्न नसकेमा सिनेटले उपराष्ट्रपति छान्ने व्यवस्था रहेको छ ।

सन् २०१२ को राष्ट्रपतीय चुनावमा बराक ओबामाले ३३२ इलेक्टोरल मत प्राप्त गरेका थिए भने मिट रोम्नीले २०६ इलेक्टोरल मत प्राप्त गरेका थिए ।

सन् २००८ को राष्ट्रपतीय चुनावमा भने ओबामाले ३६५ इलेक्टोरल मत प्राप्त गरेका थिए । त्यतीबेला उनका प्रतिस्पर्धी जोन म्याकनले १७३ इलेक्टोरल मत प्राप्त गरेका थिए । सन् २०१२ को चुनावसम्म आइपुग्दा ओबामाको लोकप्रियता कम भएको थियो ।

त्यस्तै सन् २०१६ को चुनावमा ट्रम्पले ३०४ इलेक्टोरल भोट पाएका थिए भने हिलारीले २२७ इलेक्टोरल भोट पाएकी थिइन् ।

अमेरिकी राष्ट्रपति चुनावको अनौठो पक्ष के छ भने चुनावमा बढी मत ल्याउनेले समेत चुनाव हार्नसक्छ । अमेरिकी इतिहासमा यस्तो कैयन पटक भएको छ ।

सन् २००० मा भएको राष्ट्रपति चुनावमा एल गोरले ५ करोड ९ लाख ९९ हजार ८ सय ९७ भोट ल्याए भने जर्ज बुसले ५ करोड ४ लाख ५६ हजार २ भोट ल्याए । बुसले भन्दा शुन्य दशमलव ५ प्रतिशत बढी भोट एल गोरले ल्याएका थिए । तर चुनाव जीते बुसले ।

त्यस्तै सन् २०१६ को राष्ट्रपति चुनावमा हिलारी क्लिन्टनले ६ करोड ५८ लाख ५३ हजार ५ सय १४ भोट ल्याइन् । तर ट्रम्पले त्यो भन्दा कम ६ करोड २९ लाख ८४ हजार ८ सय २८ भोट ल्याए । अर्थात् ट्रम्पले भन्दा हिलारीले झण्डै साढे २८ लाख बढी भोट ल्याइन् । तरपनि चुनाव भने ट्रम्पले नै जीते ।

यस्तो सन् १८८८ र १८७६ को चुनावमा पनि भएको छ । यस्तो घटना १८२४ मा पनि भएको थियो, तर त्यतीबेला ६ वटा राज्यहरुमा इलेक्टरहरु नियुक्त गरिएका कारण प्रकृया अलिकति फरक थियो ।

 

KHASOKHAS EDITORIAL TEAM

Editor-in-Chief : Kishor Panthi
Deputy Editor-in-Chief : Ashmita Khadka
Executive Editor : Anil Adhikari
English Editor: Rajan Thapaliya
Editor: Deepak Pariyar
Editor (Business/US Politics) : Suresh Shahi
Multimedia Editor/Presenter : Kiran Marahatta
Europe Editor: Hari Krishna Panthi
Online Editors: Suraj Ghimire, Bikram Khatri, Aashish Khanal, Dikshya Panthi
Chief Photographer: Dipendra Dhungana
Editor (Empowerment) : Sapana Pariyar

KHASOKHAS TEAM

Resource Person: Bishwa Bahadur Shah
Goodwill Ambassador: Yam Baral
Magazine Layout: Deel Gurung

Contact Us

© 2012-2020 KHASOKAHS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com