अमेरिकी राष्ट्रपतिको चुनाव आउन एकसाता बाँकी, १४ ब्याटलग्राउण्ड राज्यमा को अगाडि ?
प्रकाशित मिति : कार्तिक ११, २०७७ मंगलबार
अमेरिकी राष्ट्रपति चुनाव आउन अब एकसातामात्र बाँकी रहेको छ । नोभेम्बर ३ मा चुनावको मुख्य दिन भएपनि करोडौंले चुनाव अगाडि नै हुलाकमार्फत र अर्लि भोटिङमा सहभागी भएर मतदान गरिसकेका छन् ।
मतदाताहरुले डोनाल्ड ट्रम्प अर्को कार्यकालका लागि पनि ह्वाइटहाउसमा नै रहने वा ह्वाइट हाउस छाड्ने भन्ने कुराको निर्धारण नोभेम्बर ३ मा गर्नेछन् । सन् १९७० देखि राजनीतिमा सकृय अर्का उम्मेदवार जो बाइडेन तत्कालिन राष्ट्रपति बराक ओबामाका उपराष्ट्रपतिका रुपमा चर्चित छन् ।
पछिल्ला राष्ट्रिय सर्वेक्षणहरुमा बाइडेन अगाडि देखिएका छन् । राष्ट्रिय सर्वेक्षणमार्फत राष्ट्रिय रुपमा को बढी लोकप्रिय छ भन्ने कुरा जान्न मद्दत पुग्छ । तर राष्ट्रिय सर्वेक्षणहरुले चुनावको नतिजाको प्रक्षेपण गर्नसक्छन् भन्ने ठोकुवा भने गर्न सकिन्न ।
सन् २०१६ को चुनावमा हिलारी क्लिन्टन यस्ता सर्वेक्षणहरुमा अगाडि थिइन् । उनले ट्रम्पको तुलनामा झण्डै ३० लाख बढी मत पनि ल्याएकी थिइन् । तर पनि उनले चुनावमा भने पराजित हुनुपरेको थियो । इलेक्टोरल कलेजका आधारमा नतिजा निर्धारण हुने भएकाले अमेरिकी चुनावमा पपुलर मत बढी ल्याउनेले पनि हार्नसक्छ ।
यो बर्षको सुरुदेखिका अधिकांश सर्वेक्षणहरुमा बाइडेनले नै नेतृत्व गरेका छन् । चुनाव आउन ७ दिन बाँकी रहँदा बाइडेनको पक्षमा ५२ प्रतिशत र ट्रम्पका ४२ प्रतिशत देखिएको छ । तर चुनाव कस्ले जित्छ भन्ने थाहा पाउन भने चुनावपछिका पनि कैयन हप्ताहरु कुर्नुपर्ने देखिन्छ ।
राष्ट्रपति चुनावमा कुल ५३८ इलेक्टोरल कलेज भोटमध्ये विजयी हुनका लागि कम्तीमा २७० इलेक्टोलर कलेज भोटको आवश्यकता पर्छ । अहिलेसम्मका सर्वेक्षणहरुमा १४ वटा ब्याटलग्राउण्ड राज्यहरुमध्ये ३ वटामामात्र ट्रम्प अगाडि देखिएका छन् । ११ वटामा बाइडेन अगाडि देखिएका छन् ।
सन् २०१६ मा ट्रम्पले चुनाव जितेको एरिजोनामा सर्वेक्षणमा बाइडेन अगाडि देखिएका छन् । बाइडेनको पक्षमा ४८ दशमलव ८ प्रतिशत रहेको छ भने ट्रम्पका पक्षमा ४६ दशमलव ४ प्रतिशत रहेको छ । एरिजोनामा ट्रम्पले सन् २०१६ मा ३ दशमलव ६ प्रतिशत मत बढी ल्याएर चुनाव जितेका थिए ।
त्यस्तै सन् २०१६ मा ट्रम्पले १ दशमलव २ प्रतिशत बढी भोट ल्याएर चुनाव जितेको फ्लोरिडामा सर्वेक्षणमा बाइडेनका पक्षमा ४९ प्रतिशत र ट्रम्पका पक्षमा ४७ दशमलव २ प्रतिशत देखिएको छ । फ्लोरिडा ब्याटलग्राउण्ड राज्यमध्येको पनि महत्वपूर्ण राज्य हो ।
लामोसमयदेखि रिपब्लिकनको प्रभाव कायम रहेको जर्जियामा सन् २०१६ को चुनावमा ट्रम्पले ५ दशमलव २ प्रतिशत बढी मत ल्याएर चुनाव जितेका थिए । तर यो राज्य अब ब्याटलग्राउण्ड राज्य भएको छ । सर्वेक्षणमा ट्रम्पका पक्षमा ४७ दशमलव २ प्रतिशत र बाइडेनका पक्षमा ४६ दशमलव ८ प्रतिशत देखिएको छ ।
आयोवामा सन् २०१६ मा ट्रम्पले ९ दशमलव ५ प्रतिशत बढी भोट ल्याएर चुनाव जितेका थिए भने मिशिगनमा शुन्य दशमलव २ प्रतिशत बढी भोट ल्याएर चुनाव जितेका थिए । तर सर्वेक्षणमा दुबै राज्यमा अहिले बाइडेनको अग्रता देखिएको छ ।
२०१६ मा हिलारीले चुनाव जितेका मिनेसोटा, नेभाडा र न्यु ह्याम्पशायरमा सर्वेक्षणहरुमा बाइडेनको अग्रता देखिएको छ । सन् २०१६ मा ट्रम्पले चुनाव जितेका नर्थ क्यारोलिनामा पनि बाइडेनको अग्रता देखिएको छ । तर २०१६ मा ट्रम्पले चुनाज जितेका ओहायो र टेक्सासमा भने अहिले पनि ट्रम्पकै अग्रता देखिएको छ ।
२०१६ मा ट्रम्पले चुनाव जितेका पेन्सिलभेनिया र विसकन्सिनमा बाइडेनको अग्रता देखिएको छ भने २०१६ मा हिलारीले चुनाव जितेको भर्जिनियामा पनि बाइडेनको अग्रता देखिएको छ ।