बोलवाला बासु : न्युयोर्क टप्ने प्रयासमा स्कुलदेखि कलेज टपर वकिल
प्रकाशित मिति : भाद्र ८, २०७३ बुधबार
न्युयोर्क सधै जागा रहने सहरका रुपमा परिचित छ । यही जागाराम न्युयोर्कमा कहिलेकाँही एकजना कानुन व्यवसायी लेटनाइटसम्म पनि न्युयोर्कको क्वीन्समा रहेको कार्यालयको कम्प्युटरमा व्यस्त रहेका हुन्छन् । कुनै काममा हात हालिसकेपछि त्यो काम पूरा नगर्दासम्म जुधिरहने स्वभावका ति युवा कानुन व्यवसायीको मोबाइलमा श्रीमतिको फोन बज्न थालेपछि मात्र उनले लेटनाइट भइसकेको चाल पाउँछन् ।
उनी हुन्, अमेरिकामा कानुन व्यवसायमा सकृय एकजना नेपाली युवा बासुदेव फूलारा । फूलारा भन्छन् –“कानुनी डेडलाइनका कारण कहिलेकाँही कुनै काम त्यसैदिन सकाउनुपर्ने हुन्छ । कानुनी डेडलाइन एकदिन मिचेमा पनि क्लाइन्टको भविश्य बर्बाद हुनसक्छ । त्यसैले कहिलेकाँही मध्यरातसम्म बसेर पनि काम सकाउनुपर्ने हुन्छ ।” सुरु गरेको काम नसिध्याउदासम्म त्यसैमा एकोहोरो लागिरहने फूलारालाई कहिलेकाँही त मध्यरात हुन लागेको पनि पत्तो हुँदैन, घरबाट फोन आएपछि मोबाइल हेर्दा मात्र उनले पत्तो पाउँछन् मध्यरात हुन लागेको ।
मध्यरात हुन लागेको पत्तो नपाउने उनको नयाँ आदत होइन । विद्यालयमा होस् वा कलेजमा उनले अध्ययन गर्ने क्रममा पनि मध्यरात भएको पत्तो पाउँदैनथे । कुनै पाठ अध्ययन गर्न लागेपछि त्यसैभित्र घोत्लिने स्वभावका फूलारा त्यसैकारण विद्यालयदेखि कलेजसम्म सधै प्रथम भए । डोटीको ग्रामिण बस्तीमा पिता हरिदत्त फूलारा र माता पद्मादेवि फूलाराका सन्तानका रुपमा जन्मिएका बासु फूलाराले कक्षा १ देखि ५ सम्म स्थानीय सरस्वती प्राथमिक विद्यालयमा अध्ययन गर्दा कक्षाको कुरा छाडौं, सधै विद्यालयमा नै सबैभन्दा धेरै नम्बर ल्याएर ‘स्कुल फस्ट’ हुन्थे । त्यसपछि कक्षा ६ देखि १० सम्म डोटीकै शारदा माध्यामिक विद्यालयमा अध्ययन गर्दा पनि उनी हरेक वर्ष ‘स्कुल फस्ट’ भए ।
२०४८ सालमा प्रथम श्रेणीमा एसएलसी पास गरेपछि उनी स्थानीय डोटी बहुमुखी क्याम्पसमा आइएल अध्ययन गर्न थाले । त्यहाँ पनि उनी कलेज टपर भए । उनको तेजिलो पढाईका कारण डोटी बहुमुखी क्याम्पसमा दुईवर्षसम्म छात्रबृत्ति पनि पाएका थिए । त्यसपछि उनी अध्ययनका शिलशिलामा काठमाडौं हान्निए । नेपाल ल क्याम्पसमा बीएल अध्ययन गरेका उनलाई त्यहाँ पनि दोश्रो हुनु परेन । फूलारा बीएलमा पनि नेपाल ल क्याम्पस टपर भए । त्रिभुवन विश्वविद्यालयबाट एलएलएम गरेका उनी लगातार दुईवर्ष सम्म नै कलेज टपर भए । एलएलएममा कलेजमा मात्र होइन, देशभरमै सबैभन्दा बढी नम्बर ल्याएर नेपाल टपर भइसकेपछि उनले तत्कालिन राजाबाट महेन्द्र विद्या भूषण समेत प्राप्त गरेका थिए ।
त्यतीबेला उनले नेपाल ल क्याम्पसमा एलएलएम टप गरे वापत सन् २००१ म जर्ज वारेन ब्राउनको सर्ट टर्म स्कलरसिप प्राप्त गरेका थिए । नेपालमा लामो समय अध्ययन अनुसन्धानमा विताएका उनले सन् २००३ मा नेपालमा पनि कानुन व्यवसायीको लाइसेन्स प्राप्त गरेका थिए । उनले नेपालमा एपेक्स कलेजमा ३ वर्षसम्म कानुन विषय पढाउने काम समेत गरे । त्यसपछि सन् २००५ मा अमेरिका आएका उनले अमेरिकाका सबैभन्दा टप ४९ मध्येको एउटा येशिभा युनिभर्सिटी अन्तरगतको कार्डोजो स्कुल अफ ल न्युयोर्कबाट ल विषयमा ग्रयाजुएट गरे । उनले यो कलेजमा अध्ययनका क्रममा सन् २००६ मा डिन मेरिट स्कलर समेत प्राप्त गरेका थिए ।
सन् २००५ मा अमेरिका आइसकेपछि कानुनी विषयमा अध्ययन अनुसन्धानमा व्यस्त रहेका फूलाराले सन् २०११ मा अमेरिकामा कानुन व्यवसायीको लाइसेन्स प्राप्त गरे । त्यसपछिका चारबर्षमा नै उनी न्युयोर्कका चर्चित नेपाली कानुन व्यवसायी बन्न सफल भएका छन् । सन् २०११ देखि यता अमेरिकामा अध्ययागमन सम्बन्धी र रियल स्टेट सम्बन्धि कैयन मुद्दा जितिसकेका उनले अपराधसम्बन्धि मुद्दा र सर्वोच्च अदालतका मुद्दाहरु समेत हेरेका छन् । उनले एसाइलमका संघीय मुद्दामा अमेरिकाका झण्डै दर्जन राज्यहरुमा पुगेर समेत वकालत गरेका छन् ।
नेपाली, बंगाली, पाकिस्तानी, तिब्बती र भारतीय लगायतका सेवाग्राहीका मुद्दा हेरेका फूलाराले डिपोर्टेशनका प्रोसेसमा रहेका कैयन व्यक्तिका मुद्दा समेत हेरिरहेका छन् । तीनवर्षको छोटो अवधिमा नै अहिलेसम्म सयौं मुद्दा हेरेको अनुभव संगालिसकेका उनले गरिब, बृद्ध, अशक्त लगायतका व्यक्तिलाई निशुल्क कानुनी सेवा समेत प्रदान गर्दै आएका छन् । नेपालमा द राइजिङ नेपाल, बिजनेश एज लगायतका पत्रिकाहरुमा सोधमुलक आलेखहरु प्रकाशित गरेका उनले अमेरिकामा समेत नेपालीहरुलाई काम लाग्ने कानुनी विषयमा संचारमाध्यमहरुमा कलम चलाउदै आएका छन् ।
हाल न्युयोर्कको क्षेत्री एण्ड एसोसिएट्स पीसीमा आवद्ध रहेर कानुन व्यवसायमा सकृय फूलाराले यसरी नेपालदेखि अमेरिकासम्मका अदालतमा बहस गरेको अनुभव हासिल गरिसकेका छन् भने उनी न्युयोर्क सिटी बार एसोसिएसन र क्वीन्स काउन्टी बार एसोसियसनका सदस्य समेत हुन् । आफ्नो काममा दत्तचित्त भएर लाग्ने स्वभावका कारण उनी अध्ययन र पेशामा सफल बन्दै गएका हुन् । श्रीमति प्रतिमा खतिवडा र दुई छोराछोरीका साथ न्युयोर्कमा बस्दै आएका फूलाराको भविश्यमा पनि कानुनी क्षेत्रमा नै सकृय हुने योजना छ ।
फोटो ः तत्कालिन राजाबाट महेन्द्र विद्या भूषण ग्रहण गर्दै बासु फूलारा ।