न्युयोर्कमा अधिकांशको बेरोजगारी विमाको २६ हप्ता समाप्त, पीईयुसीको १३ हप्ते अवधि सुरु
प्रकाशित मिति : आश्विन २७, २०७७ मंगलबार
न्युयोर्कमा बेरोजगारी विमा रकम लिइरहेकाहरुमध्ये अधिकांशको २६ हप्ताको अवधि समाप्त भएपछि महामारी आपतकालिन बेरोजगारी क्षतिपूर्ति पीईयुसीको १३ हप्ते अवधि सुरु भएको छ । परम्परागत बेरोजगारी विमा रकम लिइरहेकाहरुले २६ हप्तासम्ममात्र लिन पाउने नियम भएपनि महामारीका कारण महामारी आपतकालिन बेरोजगारी क्षतिपूर्ति पीईयुसी अन्तरगत १३ हप्ता थपिएको हो ।
महामारी आपतकालिन बेरोजगारी क्षतिपूर्ति पीईयुसी अन्तरगत १३ हप्ता समाप्त भएपछि अरु २० हप्ताका लागि एक्सटेण्डेड बेनिफिट ईबी प्राप्त गर्न सकिनेछ । तर परम्परागत बेरोजगारी विमा रकमको साटो महामारी बेरोजगारी सहायता पीयुए पाइरहेकाहरुको भने त्यसको अवधि स्वत ४६ हप्तासम्म पाउनसकिने गरी थपिएको छ ।
परम्परागत बेरोजगारी विमा रकम लिइरहेकाहरुले पुरानो २६ हप्ताको अवधि सकिने अन्तिमसातामा केही ४ दिनभन्दा कम दिनहरुमात्रै बाँकी रहेको खण्डमा उनीहरुले उक्त अन्तिम सातामा विगतको तुलनामा कम रकम पाउनेछन् । तर अर्कोसाता महामारी आपतकालिन बेरोजगारी क्षतिपूर्ति पीईयुसीको अवधि सुरु हुनासाथ उनीहरुले पहिलेकै साताहरुमा पाएकै रकम प्राप्त गर्नेछन् ।
तर २६ हप्ते परम्परागत बेरोजगारी विमाको अन्तिम सातामा २ दिनमात्र बाँकी रहेको खण्डमा २ दिनकोमात्र रकम पाएकाहरुले १३ हप्ते पीईयुसीको अवधि सुरु भएपछि पनि बाँकी २ दिनको रकम भने प्राप्त नगर्ने न्युयोर्क डिपार्टमेन्ट अफ लेवरले जनाएको छ । १३ हप्ते पीईयुसी र त्यसपछिको २० हप्ते ईबी कार्यक्रम संसदबाट पारित केयर्स एक्टले बनाएको हो ।
पम्परागत बेरोजगारी विमा रकम पाइरहेकाहरुले यसरी ५९ हप्तासम्म रकम पाउनसक्ने भएतापनि पीयुए पाइरहेकाहरुले भने कुल ४६ हप्तासम्ममात्र रकम पाउनेछन् । अर्थात् कसैले मार्चको मध्यदेखि पीयुए पाउन सुरु गरेको छ भने उसले आगामी जनवरीको अन्त्यसम्मात्र पीयुए रकम पाउन सक्नेछ । पीयुएको ४६ हप्ता सकिएपछि भने अहिलेका लागि अरु अवधि थपिएको छैन ।
थपिएको अवधिको साप्ताहिक प्रमाणिकरण गर्दा पहिलेको भन्दा कुनै फरक छैन । पहिले जसरी गरिदै आएको छ, त्यसरी नै साप्ताहिक प्रमाणिकरण गर्न सकिनेछ । तपाईको २६ हप्ताको अवधि सकिएर तपाईको रकम बाँकी दिनमा शुन्य लेखेको छ भने पनि चिन्ता नगर्नुहोला, नियमित साप्ताहिक प्रमाणिकरण गरेपछि तपाईले रकम पाउनुहुनेछ ।