सरकार र डा. केसीपक्षबीच वार्ता हुँदै
प्रकाशित मिति : आश्विन २२, २०७७ बिहीबार
सरकार र अनसनरत डा.गोविन्द केसी पक्षबीच आज वार्ता हुँदैछ । वार्ता अपराह्न ४ बजेपछि गर्ने तयारी रहेको छ । सरकारी टोलीका संयोजक शिक्षा सचिव गोपीनाथ मैनाली दिउँसो २ देखि ४ बजेसम्म हुने सार्क मन्त्रीस्तरीय बैठकमा सहभागी हुनुपर्ने भएकाले त्यसपछि वार्ता गर्ने तयारी छ ।
स्वास्थ्य क्षेत्रमा सुधारको माग गर्दै अनसन बसेको २४ औँ दिनमा सरकारले बुधबार शिक्षा मन्त्रालयका सचिव गोपीनाथ मैनालीको संयोजत्वकमा वार्ता टोली गठन गरेको थियो । टोलीमा स्वास्थ्य मन्त्रालयका सहसचिव डाक्टर गुणराज लोहनी र चिकित्सा शिक्षा आयोगका निर्देशक डाक्टर दिलीप शर्मा सदस्य छन् । यता, डा. केसीपक्षबाट डाक्टर जीवन क्षेत्रीको संयोजकत्वमा नेपाल स्वास्थ्य अनुसन्धान परिषद्का अध्यक्ष डाक्टर अञ्जनीकुमार झा, नेपाल चिकित्सक संघका अध्यक्ष डाक्टर लोचन कार्की र अधिवक्ता ओमप्रकाश अर्याल सदस्य रहेको टोली गठन भएको छ ।
स्वास्थ्य क्षेत्रमा सुधारका विभिन्न ६ बुँदे माग राख्दै डाक्टर केसी १९ औं पटक अनसन बसेका हुन्।उनले सरकारसँग ०७५ साउन १० गते गरिएको सम्झौताअनुसार चिकित्सा शिक्षा ऐन संशोधन गर्नुपर्ने, त्रिवि चिकित्साशास्त्र अध्ययन संस्थान आईओएममा वरिष्ठता मिचेर गरिएका नियुक्ति सच्याउनुपर्ने र बयलपाटा अस्पताललाई नियमित र आवश्यक बजेट व्यवस्था गरी निःशुल्क स्वास्थ्य सेवा सुनिश्चित गर्नुपर्ने लगायत ६ बुँदे माग राखेका छन् ।
