न्युयोर्क निवासी कलाकार नन्दिता केसीको पहलमा नेपालमा महामारी प्रभावितहरुलाई खाद्यान्न
प्रकाशित मिति : भाद्र ३०, २०७७ मंगलबार
अमेरिकाको न्युयोर्क निवासी कलाकार नन्दिता केसीको पहलमा कोरोना महामारीमा प्रभावित एचआइभी पीडित बालबालिका, फिल्म क्षेत्रका प्राविधिक, डान्सर लगायतलाई सहयोग प्रदान गरिएको छ । आश्रमहरूमा बस्ने र दिनभर काम गरेर बेलुका छाक टार्ने मजदूरहरूलाई पनि सहयोग गरिएको छ ।
उनले जन्मथलो अर्घाखाँचीमा तीस परिवारलाई खाद्यान्न प्रदान गर्ने जनाएकीछिन् । राजधानीमा भोका मजदुरहरुलाई खाना खुवाउने कार्यक्रम भईरहेको तथा खाना पकाउने ग्यास, नगद, खाद्यान्न वितरण गरिएको उनले बताइन् ।
केसीले बाइक दुर्घटनामा परेका कलाकार सन्नी रसाईलीलाई पन्ध्र हजार नगद सहयोग पनि गरेकी छिन् । नन्दिताको पहलमा भएको राहत वितरण कार्यक्रममा परिवारका सदस्यहरु बहिनी सजना केसी र दाई मोहन विक्रम केसीले सहयोग हस्तान्तरण गरेका छन् ।
किर्तिपुरमा रहेको बेबी लाइफ होममा पन्ध्र हजार बराबरको रासन वितरण गरिएको छ। त्यहाँ २७ जना जन्मजात एचआइभी संक्रमित बालबालिका बस्दछन् । नन्दिताले यी बालबालिकालाई लगातार सहयोग गर्दै आइरहेकी छन्।
अमेरिकामा बस्ने नेपाली कलाकारहरु लगायत अन्य दाताहरुले यो अभियानमा सहयोग गरेका छन् ।