लोक आधुनिक गीत ‘लिन आउँछु भन्थ्यौ’ : १३ बर्षपछि गायनयात्रामा न्युयोर्क निवासी उर्मिला
प्रकाशित मिति : भाद्र २५, २०७७ बिहीबार
अमेरिकाको न्युयोर्क निवासी गायिका उर्मिला लाम्गादेको नयाँ गीत भिडियो सहित सार्वजनिक भएको छ । लिन आउँछु भन्थ्यौ भन्ने बोलको गीत बुढा सुव्वा डिजिटल मार्फत युट्युवमा सार्वजनिक गरिएको हो ।
गीत सार्वजनिक भएपछि लाम्गादेले भनिन् – ‘आज मेरा लागि एकदमै खुशीको दिन हो । लामो समयदेखिको गीत निकाल्ने इच्छा पूरा भएको छ । आशा छ दर्शक, श्रोताहरुले गीत मन पराइदिनु हुनेछ ।’
गीतमा संगीत अर्जुन पोख्रेलको रहेको छ भने शव्द दिग्गज धौरालीको रहेको छ । गीत लोक आधुनिक शैलीको रहेको छ । गीतमा कलाकार पूजा शर्मा र राज कटुवालको अभिनय रहेको छ । गीतलाई कविराज गहतराजले निर्देशन गरेका छन् ।
झण्डै १३ बर्षपछि गायन यात्रामा
उर्मिला लाम्गादेको झण्डै १३ बर्ष अगाडि एउटा भजन रेकर्ड भएको थियो । उक्त भजन भिडियोसहित रिलिज भएको थियो । त्यसपछि उनको कुनै पनि गीत रेकर्ड भएन । लाम्गादे भन्छिन् गीत निकाल्ने इच्छा थियो । तर समयले साथ दिएन ।
झण्डै तीनमहिना अगाडि उनको रुकुम घटनामा आधारित गीत निस्केपनि व्यवस्थीत तरिकाले भिडियो भने बन्न सकेन । तर यो गीत व्यवसायिक रुपमा नै निर्माण गरिएको लाम्गादेले बताइन् । यो गीत न्युयोर्कको म्यानहटनमा रहेको ज्याम्बक्स इन्टरटेन्मेन्ट स्टुडियो र ज्याक्सनहाइटमा रहेको ओम रेकर्डिङ स्टुडियोमा रेकर्ड भएको हो ।
झण्डै १३ बर्षपछि गायनयात्रामा आउँदा आफू निकै उत्साहित भएको र अब गायनलाई निरन्तरता दिने योजना रहेको उनले बताइन् । उनी भन्छिन् – ‘धेरै गीतहरु निकाल्दिन । तर आफूलाई मन परेका र छानिएका गीतहरु गाउँदै गायनयात्रालाई पनि निरन्तरता दिने योजना बनाएकी छु ।’
अभिनयमा रुची
उर्मिला लाम्गादेको अभिनयमा निकै रुची थियो । हेटौंडा रातामाटेमा जन्मिएकी उनी बच्चैदेखि अभिनयमा रुची राख्थिन् । तर उक्त शौख पूरा गरिदियो टेलिचलचित्र दलनले । जातीय विभेदबिरुद्धको उक्त टेलिचलचित्र झण्डै १० बर्षअगाडि रिलिज भएको थियो ।
दलनमा उनले दलितभित्रको पनि अन्तरजातीय जोडीका रुपमा अभिनय गरेकी छिन् । दलनमा नैना नामको पात्रको अभिनय गरेकी उनी म्युजिक भिडियोमा समेत देखिएकी थिइन् । त्यस्तै टेलिभिजनका केही चेतनामुलक विज्ञापनहरुमा पनि अभिनय गरिन् । स्वास्थ्य मन्त्रालयले निर्माण गरेको उक्त विज्ञापन नेपाल टेलिभिजनबाट खुब बज्यो ।
अभिनयमा रुची भएपनि सन् २०११ मा उनी अमेरिका आएकाले अभिनययात्रालाई अगाडि बढाउन सकिनन् । अब बच्चाहरु पनि हुर्किसकेकाले गायनयात्रालाई अगाडि बढाउनमा सहज वातावरण भएको उनी बताउँछिन् ।
बाल्यकालमा नै बुबाआमा गुमाएपछि असहज
विभिन्न कार्यक्रममा गाउने र बच्चैदेखि गाउने भएपनि गायनयात्रामा अगाडि बढ्नमा विभिन्न कुराले पछि परेको बताउँछिन् उनी । उनले बुबालाई बच्चैमा गुमाउनुपरेको थियो । झण्डै १६ बर्ष अगाडि आमालाई पनि गुमाउनुपर्यो ।
‘बच्चैमा बुबा वित्नुभयो । अब केही गरौं भन्ने उमेरमा आमा बित्नुभयो । त्यसैले बुबाआमाहरु नभएका कारणले पनि मलाई कलाकारिता यात्रामा अगाडि बढ्न त्यती सहज भएन ।’ – उनी भन्छिन् ।
हिन्दु भजनबाट गायनयात्रा सुरु गरेकी उनले अब केही महिनामा क्रिश्चियन गीत पनि निकाल्ने योजना बनाएकी छिन् । अबको केही महिनामा उक्त गीत भिडयोसहित निकाल्ने उनको योजना छ ।