सेप्टेम्बरका लागि नेपाल जान नियमित ६० र चार्टड २७ उडानलाई अनुमति (अवतरण तालिका)
प्रकाशित मिति : भाद्र ९, २०७७ मंगलबार
नेपालको संस्कृति, पर्यटन तथा नागरिक उड्ययन मन्त्रालयले सेप्टेम्बरका लागि नेपाल जाने नियमित ६० र चार्टड २७ उडानलाई अनुमति दिएको छ । नियमित तर्फ विदेशी एयरलाइनसलाई ३१ र स्वदेशीलाई २९ वटा उडानको अनुमति दिइएको छ ।
पहिलो दिन सेप्टेम्बर २ तारिखमा दिन मलेसियाबाट उडेको मालिन्दो र जापानबाट उडेको नेपाल एयरलाइन्सको नियमित विमान अवतरण गर्नेछ । सेप्टेम्बरभर नेपाल एयरलाइन्सले जापान, दुबई, मलेसिया र हङकङबाट १७ वटा नियमित उडान गर्नेछ । जसमध्ये ८ वटा उडान दुबईबाट हुनेछन् । त्यस्तै हिमालय एयरलाइन्सले सेप्टेम्बरभर चाइना, मलेसिया र अबुधाबीबाट १२ वटा नियमित उडान गर्नेछ ।
सम्पूर्ण उडान तालिका यहाँ हेर्नुहोला ।
विदेशी एयरलाइन्सका सन्दर्भमा भने मालिन्दोलाई ३ वटा, टर्किसलाई ४ वटा, क्याथे ड्रागनलाई २ वटा, कोरियन एयरलाई ४ वटा, चाइना साउदर्नलाई ४ वटा, एयर अरेबियालाई ३ वटा, कतार एयरलाइन्सलाई ४ वटा, फ्लाई दुबईलाई ३ वटा, मलेसियन एयरलाइन्सलाई २ वटा, एयर चाइनालाई २ वटा नियमित उडानको अनुमति दिइएको छ ।
चार्टड उडानको अनुमति भने हिमालय, नेपाल एयरलाइन्स, जजिरा र सलाम एयरलाइन्सलाईमात्र दिइएको छ । उनीहरुले मालदिभ्स, दोहा, कुवेत, जेद्दा, दमाम, ओमान र रियादबाट चार्टड उडानहरु गर्नेछन् । सेप्टेम्बर ३ र सेप्टेम्बर १७ बाहेक हरेक दिन चार्टड विमानहरु अवतरण गर्ने तालिका बनाइएको छ ।
क्वारेन्टीनमा बस्नका लागि तोकिएको होटल र दररेट यहाँ हेर्नुहोला ।
यी उडानमार्फत नेपाल आउनेहरुले झण्डै एकदर्जन शर्तहरु पालना गर्नुपर्नेछ । नियमित उडानबाट आउनेहरुले विमान चढ्नुभन्दा ७२ घण्टाभित्र कोरोना नेगेटिभ भएको प्रमाणपत्र ल्याउनुपर्ने, एउटै उडानबाट आएका कोरोना नेगेटिभ रिपोर्ट भएकाहरु १४ दिन अनिवार्य होम क्वारेन्टीनमा बस्नुपर्ने, यात्रुहरुले कोभिड १९ संकट व्यवस्थापन केन्द्रको वेवसाइटमा रहेको नेपाल आउनेले भर्नुपर्ने अनलाइन फर्म भरेर त्यसको बारकोड वा प्रिन्ट कपी साथमा लिई आउनुपर्ने लगायतका शर्तहरु रहेका छन् ।
त्यस्तै एउटै उडानबाट कोरोना नेगेटिभ भएका र परीक्षण नभएका व्यक्तिलाई ल्याउन नपाइने, कोरोना नेगेटिभ भएका र परीक्षण नभएका व्यक्तिलाई एउटै उडानबाट ल्याएमा सबै यात्रु होटल क्वारेन्टीनमा बस्नुपर्ने र होटल क्वारेन्टीनमा लागेको खर्च सम्बन्धित एयरलाइन्सले नै बेहोर्नुपर्ने, नियमित उडानमा कोरोना परीक्षण नगराएका, होटल बुक नगरेका वा अन्य शर्त पुरा नगरेका कुनै यात्रु ल्याएमा सरकारले त्यस्ता एयरलाइन्सलाई कारवाही गर्ने शर्तहरु रहेका छन् ।