भदौ १६ पछि पनि एनआरएनहरु नेपाल जान नपाउने, को जान पाउने ? गएपछि के गर्नुपर्ने ?
प्रकाशित मिति : भाद्र ९, २०७७ मंगलबार
नेपाल सरकारले भदौ १६ गतेबाट अन्तर्राष्ट्रिय हवाई उडानहरू खुला गर्ने निर्णय गरिसकेको छ । तर ती उडानहरुमार्फत विदेशमा रहेका गैर आवासीय नेपालीहरु भने जान नपाउने भएका छन् ।
यसअघि सरकारले भदौ १ गतेबाट उडान सञ्चालन गर्न दिने निर्णय गरेपनि उक्त मिति भदौ १६ सम्मका लागि पछाडि सारिएको थियो ।
यस अगाडि आपतकालिन अवस्थामा रहेका एनआरएनहरुलाई समेत नेपाल जान अनुमति दिइएको छ । नेपाल जानुपर्ने अवस्थामा रहेका कैयन एनआरएनहरु कन्सुलेटहरुबाट पत्र लिएर नेपाल गएका थिए ।
को को जान पाउँछन् ?
नयाँ निर्णय अनुशार पीसीआर परीक्षण सहज भएका मलेसिया, युएई, दक्षिण कोरिया, थाइल्याण्ड, जापान, चीन, हङकङ, अष्ट्र्रेलिया, अमेरिका, क्यानडा र युरोपेली मुलुकबाट नेपाल सरकारको निर्णय अनुशार नेपाल आउन अनुमति भएका नेपाली नागरिक र नेपालस्थीत विदेशी नियोगका कुटनीतिज्ञ तथा कर्मचारीहरु, संयुक्त राष्ट्र संघ, विकाश साझेदार संस्थाका कर्मचारी तथा प्रतिनिधिहरु मात्र नेपाल आउन पाउनेछन् ।
तर कोरोना परीक्षण सहज नभएका मुलुकहरु भन्दै साउदी, अरब, कुवेत, कतार वा अन्य मुलुकबाट नियमित उडानबाट यात्रुहरु ल्याउन नपाइने भएको छ । त्यस्ता मुलुक र नियमित उडानका लागि अनुमति नभएका श्रमिक रहेका मुलुकबाट सम्बन्धित नेपाली कुटनीतिक नियोगबाट सिफारिस भएको नामावली बमोजिमका यात्रु चार्टर उडानमार्फत भने नेपाल आउन सक्नेछन् ।
नियमित उडानबाट जाँदा कोरोना नेगेटिभ भएको प्रमाणपत्र अनिवार्य
नियमित उडानबाट आउनेहरुले विमान चढ्नुभन्दा ७२ घण्टाभित्र कोरोना नेगेटिभ भएको प्रमाणपत्र ल्याउनुपर्नेछ । साथै उनीहरुले कोभिड १९ संकट व्यवस्थापन केन्द्रको वेवसाइटमा रहेको नेपाल आउनेले भर्नुपर्ने अनलाइन फर्म भरेर त्यसको बारकोड वा प्रिन्ट कपी साथमा लिई आउनुपर्नेछ ।
नियमित उडानको तालिका संस्कृति, पर्यटन तथा नागरिक उड्ययन मन्त्रालयले प्रकाशन गर्ने जनाइएको छ ।
प्रमाणपत्र ल्याउनेहरु होम क्वारेन्टीनमा बसे हुने
कोरोना नेगेटिभ भएको प्रमाणपत्र भएका यात्रु सबैलाई दर्ता र स्वास्थ्य परीक्षणको कार्य सकिएपछि कम्तीमा १४ दिन घरमै क्वारेन्टीनमा बस्ने लिखित प्रतिबद्धतासहित जान दिने र त्यसको अनुगमन स्थानीय तहले गर्ने जनाइएको छ ।
अर्थात् मलेसिया, युएई, दक्षिण कोरिया, थाइल्याण्ड, जापान, चीन, हङकङ, अष्ट्र्रेलिया, अमेरिका, क्यानडा र युरोपेली मुलुकबाट पीसीआर वा आरटी परीक्षणको प्रमाणपत्र लिएर जानेहरु होटल क्वारेन्टीनमा बस्नुपर्ने छैन । उनीहरु होम क्वारेन्टीनमा बस्न सक्नेछन् ।
कोरोना परीक्षण नेगेटिभ भएको प्रमाणपत्र भएका र नियमित उडानबाट आएका नेपाली नागरिकलाई १४ दिन होम क्वारेन्टीनमा बस्ने लिखित प्रतिबद्धतासहित जान दिने र त्यसको अनुगमन स्थानीय तहले गर्ने जनाइएको छ ।
प्रमाणपत्र नभएकाहरु अनिवार्य होटल क्वारेन्टीनमा
वैदेशिक रोजगार वा कल्याणकारी कोषको खर्चमा उद्दार उडानबाट आउने व्यक्तिहरु बाहेक अन्य तरिकाले उद्दार उडानबाट नेपाल आउने नेपाली नागरिकहरु काठमाडौं उपत्यकाभित्रका होटलमा आफ्नै खर्चमा कम्तीमा ७ दिन अनिवार्य क्वारेन्टीनमा बस्नुपर्ने निर्णय सरकारको छ ।
अर्थात् कोरोना परीक्षण सहज नभएका मुलुकहरु भन्दै साउदी, अरब, कुवेत, कतार वा अन्य मुलुकबाट कोरोना परीक्षण नगराई चार्टड उडानबाट आउनेहरु अनिवार्य होटल क्वारेन्टीनमा बस्नुपनेर्छ । त्यसका लागि उनीहरुले पहिले नै होटल बुकको खर्च एयरलाइन्सलाई तिर्नुपर्नेछ ।
टिकट किन्दा नै एयरलाइन्समार्फत होटल बुक
होटल क्वारेन्टीनमा बस्नुपर्ने गरी हवाई उडानबाट नेपाल आउने यात्रुलाई हवाई टिकट जारी गर्दाकै अवस्थामा होटल क्वारेन्टीनमा कम्तीमा ७ दिन बस्दा लाग्ने खर्चसमेत सम्बन्धित यात्रुबाटै लिने र यसरी उठाइएको होटल क्वारेन्टीन वापतको रकम सम्बन्धित होटललाई भुक्तानी गर्ने दायीत्व सम्बन्धित एयरलाइन्सको हुनेछ ।
नियमित उडानमा कोरोना परीक्षण नगराएका, होटल बुक नगरेका वा अन्य शर्त पुरा नगरेका कुनै यात्रु ल्याएमा सरकारले कारवाही गर्ने चेतावनी दिएको छ ।
कोरोना नेगेटिभ भएका र परीक्षण नभएका मिसाएर ल्याए सबै होटल क्वारेन्टीनमा
एउटै उडानबाट कोरोना नेगेटिभ भएका र परीक्षण नभएका व्यक्तिलाई ल्याउन नपाइने नियम बनाइएको छ । कोरोना नेगेटिभ भएका र परीक्षण नभएका व्यक्तिलाई एउटै उडानबाट ल्याएमा सबै यात्रु होटल क्वारेन्टीनमा बस्नुपर्ने र होटल क्वारेन्टीनमा लागेको खर्च सम्बन्धित एयरलाइन्सले नै बेहोर्नुपर्ने जनाइएको छ ।
उद्दार उडानबाट र्यापिड टेस्ट वा पीसीआर परीक्षण नगरी अन्य परीक्षण गरेर नेपाल आएका व्यक्तिहरु आफ्नै खर्चमा कम्तीमा ७ दिन जिल्ला कोभिड १९ संकट व्यवस्थापन केन्द्रबाट सुचीकृत होटलमा अनिवार्य रुपमा क्वारेन्टीनमा बस्नुपर्नेछ । यसरी आएका व्यक्तिलाई क्वारेन्टीनमा रहेको ५ दिनपछि सरकारले कोरोना परीक्षण गरेपछि नेगेटिभ आएमा थप ७ दिन घरमै क्वारेन्टीनमा बस्नेगरी जान दिइनेछ ।
दैनिक ५ सय भन्दा बढी आउन नपाउने
नियमित वा चार्टड विमानबाट दैनिक ५ सयभन्दा बढी यात्रुलाई नेपाल आउन नदिइने भएको छ । दैनिक आगमन यात्रु ५ सयभन्दा बढी नहुने गरी सस्कृति, पर्यटन तथा नागरिक उड्ययन मन्त्रालयले नियमित र उद्दार उडान संचालनको व्यवस्था मिलाउने भएको छ ।