ट्याक्स फाइल गरेका १४ मिलियनलाई रिफण्डका अतिरिक्त थप रकम पठाउँदै आईआरएस
प्रकाशित मिति : भाद्र ३, २०७७ बुधबार
सन् २०१९ को ट्याक्स फाइल गरेका करदाताहरुलाई आईआरएसले यो साता ब्याजरकम पठाउने भएको छ । झण्डै १४ मिलियन करदाताहरुलाई यो ब्याज रकम पठाउन लागिएको हो । यो रकम औषतमा १८ डलर हुनेछ ।
जुलाई १५ भित्र कर फाइल गरेका करदाताहरुलाई उक्त रकम खातामा वा हुलाकमार्फत पठाइने भएको छ । विगत तीनमहिनाको अवधिमा ट्याक्स रिफण्ड पाएकाहरु अर्थात् जुन १५ पछि ट्याक्स रिफण्ड पाएकाहरुले पनि यो रकम पाउनेछन् । त्यस्तै रिफण्ड रकम पाउन बाँकी रहेकाहरुले पनि ब्याज पाउनेछन् ।
अधिकांश ब्याज रकम रिफण्ड रकमभन्दा अलग्गै जारी गरिने आईआरएसले जनाएको छ । १२ मिलियन भन्दा बढी करदाताहरु जसले ट्याक्स फाइल गर्दा डाइरेक्ट डिपोजिटको विकल्प दिएका थिए, उनीहरुले रिफण्ड प्राप्त गरेको त्यही खातामा नै ब्याज रकम पाउनेछन् ।
जसले डाइरेक्ट डिपोजिट सेटअप गरेका थिएनन्, उनीहरुले चेकमार्फत यो रकम पाउनेछन् । चेकमा आईएनटी रकम भनेर लेखिएको हुनेछ । यो ब्याज रकमको भने कानुन अनुशार ट्याक्स तिर्नुपर्छ । ब्याज रकम पाउनेहरुले अर्कोबर्ष सन् २०२० को कर फाइल गर्दा यो रकम उल्लेख गर्नुपर्छ ।
१० डलरभन्दा बढी ब्याज पाउनेहरुलाई आईआरएसले आगामी जनवरीमा १०९९ आईएनटी पठाउनेछ । उक्त फर्मलाई आगामी बर्षको ट्याक्स रेकर्डका रुपमा राख्न आवश्यक हुन्छ ।