‘अमेरिकाबाहिर अड्केकाहरु अमेरिका आएर पुराना हप्ताका बेरोजगारी विमा रकम पाउनसक्ने’
प्रकाशित मिति : श्रावण १०, २०७७ शनिबार
कोरोनाको महामारीका कारण अमेरिकाबाहिर अड्केकाहरु अमेरिकामा आएर महामारी सुरु भएपछिका पुराना हप्ताका बेरोजगारी बिमा रकम वा महामारी बेरोजगारी सहायता रकम पाउनसक्ने सीपीए विराज रिजालले जानकारी दिनुभएको छ । तर त्यस्का लागि व्यक्तिले आफू पहिलेको मितिमा अमेरिका आएर काम सुरु गर्न चाहेको तर महामारीका कारण आउन नसक्ने प्रमाणित गर्नुपर्ने रिजालले जानकारी दिनुभयो ।
खसोखास लाइभमा कुराकानी गर्दै उहाँले भन्नुभयो -‘अमेरिकाबाहिर रहेको व्यक्तिले बेरोजगारी विमा रकम वा महामारी बेरोजगारी सहायता रकमका लागि आवेदन दिन वा रकम लिन सक्दैन । तर अमेरिका आएर काम सुरु गर्न चाहेको तर महामारीको कारणले अमेरिका आउन नसकेको व्यक्तिले अमेरिका आइसकेपछि पुराना हप्ताको लागि पनि दावी गर्न सक्छ । र पहिलेका हप्ताको रकम प्राप्त गर्नसक्छ ।’
अमेरिकामा बेरोजगारी विमा वा महामारी बेरोजगारी सहायता रकम पाइरहेकाहरुले अमेरिकाबाहिर गएको खण्डमा भने अमेरिकाबाहिरबाट साप्ताहिक प्रमाणिकरण गरेर उक्त रकम लिन नसक्ने उहाँले जानकारी दिनुभयो । अमेरिकाबाहिर रहेको अवस्थामा पनि महामारी बेरोजगारी सहायता रकम वा बेरोजगारी विमा रकम लिएमा जालसाजीको अभियोगमा कारवाही हुने र रकम फिर्ता गर्ने अवस्था आउनसक्ने उहाँले बताउनुभयो ।
बेरोजगारी विमा रकम, अमेरिकी सरकारले प्रदान गर्ने इकोनोमिक इन्जुरी डिसास्टर लोन, पेचेक प्रोटेक्सन लोन लगायतका विषयमा खसोखासका प्रधानसम्पादक किशोर पन्थीले सीपीए विराज रिजालसँग गरेको कुराकानी यहाँ हेर्न सक्नुहुनेछ ।