पूर्वडीआईजी रञ्जन कोइराला थुनामुक्त
प्रकाशित मिति : श्रावण ८, २०७७ बिहीबार
सशस्त्र प्रहरी बलका पूर्वडीआइजी रञ्जन कोइराला थुनामुक्त भएका छन् । श्रीमती गीता ढकालको हत्या अभियोगमा जेल परेका कोइराला बिहिबार डिल्लीबजार कारागारबाट थुनामुक्त भएका हुन् ।
सर्वोच्च अदालतको आदेश बमोजिम कोइरालाले ८ वर्ष ६ महिना कैद सजाय भुक्तान गरेका छन् ।कोइरालालाई वि सं २०६८ माघ ८ गते नारायणगढबाट काठमाडौँ फर्कंदै गर्दा थानकोटबाट प्रहरीले पक्राउ गरेर मुद्दा चलाएको थियो । हत्या मुद्धामा जिल्ला र पुनरावेदन अदालतबाट जन्मकैद सजाय पाएका कोइराला यहि असार १५ गते सर्वोच्चले सजाय घटाएर ८ वर्ष ६ महिनामा झारेको थियो ।
श्रीमती गीता ढकालको हत्या गरेको मुद्दामा प्रधानन्यायाधीश चोलेन्द्रशमशेर जबरा र तेजबहादुर केसीको इजलासले सजाय घटाउने फैसला गरेको थियो । श्रीमतीको हत्या गरी शव नै जलाएर प्रमाण नष्ट गर्ने प्रयास गरेका पूर्वडीआइजी कोइराला साढे ११ वर्ष कैद छुट पाएर बिहीबार जेलमुक्त भएका हुन् । बिहिबार बिहान कोइराला थुनामुक्त भएको प्रशासनले जनाएको छ ।
प्रधानन्यायाधीश जबराको इजलासले कोइरालाको सजाय घटाउनुमा ‘श्रीमतीलाई तत्काल आवेशमा आइ हत्या गरेको देखिएको’ भनेको छ । साथै, श्रीमतीको मृत्युपछि दुई छोराको हेरचाह, संरक्षण र शिक्षामा पनि प्रभाव पर्न जाने भएको भन्दै सजाय घटाइएको छ ।
नेश्नल डिफेन्स कोर्सका लागि चीनमा रहेका तत्कालीन डीआईजी कोइरालाले विदामा काठमाडौं आएका वेला २०६८ माघमा पत्नी गीताको हत्या गरेका थिए । महाराजगञ्जमा श्रीमतीको हत्या गरेर उनले घटना लुकाउन पालुङमा शव जलाएका थिए ।